uMthunywa
Nkosilathi Sibanda
LONYAKA kuzakubanzima ukuthi kudlalwe i-basketball kuleli njengoba inhlanganiso ephethe umdlalo lo ikhala ezimathonsi kuHulumende ngokuthi ayilasekelo lwemali.
IBasketball Union of Zimbabwe ithe ifuna ukuba lomhlangano lomphathintambo womnyango wezemidlalo, uAndrew Langa ukuze bamazise ngenhlupho zomdlalo.
Umbiko lo uza ngemva kokumiswa ukuvulwa kwesizini yamaligi amathimu wonke e-basketball kuleli.
Inyathelo lokusungula iligi le laphuma ngo2013 lapho okwakukhangelelwe ukuthi kuvuselelwe umncintiswano indawo zonke.
Unobhala wenhlanganiso yeBUZ uJoe Mujuru uthe sekuseduzane lokuthi baxoxisane loHulumende ngndubo zabo.
“Kwehlule sibili ukuthi siqalise. Bekumele abadlali baqale ukuncintisa ngempelaviki edluleyo. Iligi le izadibanisa izabelo zonke, okwakuqala kumdlalo we-basketball kuleli. Ukubunjwa kwaliligi kuthiwa kakusoke kudilize imincintiswano yamaligi akulezi zabelo.
Inhlanganiso yeBUZ ithe esinye isizatho sokuba leligi entsha yikuthi umdlalo lo usutshabalala kwezinye izabelo.
“Sizama ukuvuselela i-basketball ukuze ibe ngumdlalo ogcwele iZimbabwe yonke. Nxa silamaligi angaphansi kwezabelo kuphela umdlalo awusoke ukhule. “Umdlalo lo ubusaziwa ngabantu abasemadolobheni, kodwa ngokuqala kweligi enkulu, lezinye indawo zizakhwabitha.”
UMujuru uthe amathimu angekeli ukulolonga lokudlala kumaligi anagphansi kwezabelo ukwenzela ukuthi abadlali bahlale beqinile.
Amaqembu azancintisana kuligi enkulu aphuma kumhlubulo lo abalisa akoBulawayo iHighlanders, iLakers, iGiants iSoutherners, leUnicorn yaseGweru, iRockets leSteelers ezeKwekwe.
Kusenjalo iligi yakoBulawayo ivula isizini yalonyaka ngbuhle ngoba amathimu amadoda kubikwa asezajkuba manengi. Izikolo zakoNtuthu lazo kubikwa sezitshisekela ukuncintisana kuzibanga zamaligi aphezulu.
Ukungena kwamanye amathimu kubikwa kulakho ukutshayisa uvalo kumathimu diliza amathimu abalisa iGiants leLords ngoba asebuse ku-basketball yakoBulawayo okwesikhathi eside.
