uMthunywa
Innocent Kurira
INHLANGANISO yeBulawayo Athletics Board (Bab) isilungiselele ukuphatha imincintiswano emikhulu, eyokuqala kulumnyaka ezaqhutshelwa enkundleni yeWhite City ngoMgqibelo.
Labo abazagijima bavela kundawo ezitshiyeneyo elizweni njalo kukhangelelwe ukuthi babhadale iUS$2.
Umgcinisihlalo wenhlanganiso yeBab uWatson Madanyika uthe balinde ngabomvu ukuqhuba imincintiswano.
“Sijabule kakhulu ngokungena enkundleni futhi sikhangelele ukuthi siqhube kuhle imicimbi yethu,” kutsho inkokheli le.
UMadanyika ukhuthaze izikolo, amanyuvesithi lamaqembu asemphakathini ukuthi aphatheke.
“Sikhuthaza izikolo, amakilabhu lamanyuvesithi ukuthi azokuba yingxenye yemincintiswano yethu.
“Le yimincintiswano ephathisa kakhulu abagijimayo ukuze bazilolonge kunye lokukhangelisisa ibanga abakulo njengoba bezalungiselela imincintiswano eminengi lonyaka.”
Abagijimayo bazaphatheka kumango ebalisa i100m, 200m, 400m, 1 500m, 3 000m, 100m hurdles, 110m hurdles, 400m hurdles, 4×100m, triple jump, long jump, high jump, shot put, discus, hammer le-javelin.
Kusenjalo, ihlanganiso yeBab isibeke isimemezelo sokuthi izaqhuba izifundiso zesithupha sokuqeqetsha esika-Level One eWhite City ngoLwesine.
Kubikwa kuzafundiswa labonompembe, kuhlelo lapho iBab ezabambisana khona lenhlanganiso ebambe umdlalo wokugijima izwe lonke eyeNational Athletics Association of Zimbabwe.
Izifundo lezi zizaqhutshwa okwamalanga amathathu. Labo abazafuna ukungena kuzo kumele babhadale iUS$50.
UMadanyika wazise intatheli yeZimpapers Sports Hub ukuba benze kakuhle ukuvula umnyaka omutsha ngokwenza izifundo.
Wengeze wathi bakhangelele ukuthi kube labantu abanengi.
“Ukunikeza abaqeqetshi labonompembe ulwazi kuqakathekile kwezemidlalo njalo kuluhlelo oluhle lokuvula umnyaka omutsha njengoba sikhangelele ukuqhuba imincintiswano eminengi.”
