uMthunywa
Nkosilathi Sibanda
KUTSHAYWA umpululu ngokujabula kwabadlali beqembu leKasambabezi Queens, elibeyintshantshu yeligi yeZambezi Netball Association’s Community League.
Intshantshu lezi ziqede imidlalo elitshumi lanhlanu kulisizini zinqoba, kungela iqembu elisondela eduzane lalo. Ukunqoba kweqembu leli kukhweze ukuzethemba kubadlali nanko phela kuze ngesikhathi iqembu lizama ukuthi liqale kakutsha inhlelo zalo.
IKasambabezi Queens ikhokhele iligi yamaqembu ayisikhombisa, kusukela ngomdlalo wakuqala, okwenza kwabalula ukuthi leliqembu licine liyintshatshu yalonyaka.
Iqembu elilandele emuva kube yiBangelo Club. Amanye amaqembu adlala kuZambezi Netball Association Community League abalisa iGolden Stars, Grace Mission Eagles, Discovery, Shooting Stars, Gwanzura leCorinthians.
Umqeqetshi weqembu elinqobileyo uMercy Moyo uthe uyajabula ngempumela yeqembu lakhe njalo utshayela izandla abadlali bakhe.
Uthe bonke batshengisele ukuzimisela, ukuba lokholo lokulalela izixwayiso.
“Njengoba ngike ngatsho ngaphambili, konke bekumayelana ngokholo ebesilalo. Sibumbe iqembu eliqale ngokungathembisi kodwa ngoba besikholelwa ekwenzeni kuhle, kwakumele sidlale silandele ukuzethemba okukhulu. Bengileqembu labadlali abazinikeleyo,” kutsho uMoyo ekhuluma eseFolosi.
IKasambabezi Queens ilesizatho sonke sokuthi ibobotheke, ijabule njengoba ngesizini yomnyaka odluleyo iqede ikunombolo yesibili, ngemva kweGolden Stars.
Kasambabezi Queens
Umqeqetshi uMoyo uthe ufisa ukuthi baqhubeke besenza kuhle.
“Abadlali bami ngihlala ngibatshela ukuthi abadlalele phezulu. Inkuthazo yikuthi sihlose ukwenza kuhle futhi njengabesifazane kumele sitshengise ukuthi siyenelisa ukuphumelela nge-netball. Intshantshu kayilahli ithawulo,” kutsho uMoyo.
Unobhala omkhulu weligi uMoses Nowake ubonge bonke abaphathisa ekuqhubeni iligi. Uthe iKasambabezi Queens izanikezwa inkezo yayo ngoMpalakazi.
“Konke kuhambe kuhle njalo sithanda ukubonga wonke umuntu osekela amantombazana omdlalo wokuqaga eFolosi, ngesikhathi betshengisa ithalenta labo.
“Ngabe akulasekelo, besingasoze siphumelele. Makuqhubeke kunjalo lakusasa,” kutsho uNowake.
Umcebisi weZambezi Netball Association, uLastane Tshuma, uthe bazafuna ukuthuthukiswa kwezinye inhlelo ukuze iligi yabo iphenduke ezingeni eliphezulu ngomnyaka ozayo.
“Inhloso yikuba yiligi elolonga abadlali ukuze balethe inguquko empilweni zabo lasemphakathini. Ukuze lokho kwenzakale, sidinga ukuthi sibe lezibonelo zabadlali emphakathini ezizakhankasela amalungelo abesifazane. Ngokuhamba kwesikhathi sizabe sinxusa ingcitshi zemidlalo ukuthi zifundise abaphathi bamaqembu ethu, bathuthukise abaqeqetshi labonompembe,” kutsho uTshuma.
Iligi yeZambezi Netball Association, iqale ngoMabasa ngemizamo yokuthuthukisa umphakathi wedolobho leVictoria Falls lakundawo eziseduzane.
