uMthunywa
Nkosilathi Sibanda
INHLANGANISO ephethe umdlalo we-basketball koBulawayo ibika ukuthi izakhetha iqula lekhomithi ezabona ngokudinga usekelo lwokwenza imincintiswano ezadlalelwa ngamathimu angaphansi kwayo.
UJonathan Phangwana, unobhala weBulawayo Basketball Association uthe loba imidlalo yabo yalisizini isiqalile, balokhe belodubo lokuthola imali yokuncedisa ukuthi imidlalo yabo iphumelele. Uthe okumqoka kunhlelo zabo kulumnyaka yikusungulwa kwekomithi ezaphiwa umlandu wokuthi idinge imali.
“Sekuzakuba lekomithi ekhethwe phakathi kwamaqembu esilawo. Ikomithi le ngeyokuncedisa ukuhlanganisa imali lokunye okufuneka nxa siqoqa imincintiswano engekho kukhalenda yethu yeligi. Njengoba isizini isivuliwe, kuqakathekile ukuthi amathimu ethu engadlaleli inkezo yeligi kuphela kodwa alolongele ukuthola imincintiswano ethile phakathi komnyaka,” kutsho uPhangwana.
Ukubujwa kwekhomithi kubonakala njengenyathelo elizenza kubelula ukuthi umdlalo we-basketball kuleli uthole usizo ngokuphangisa. Kukhangelelwe njalo ukuthi nxa sekulekhomithi le, ukusetshenziswa kwemali kulumdlalo kuzabekwa egcekeni.
“Sesinanzelele ukuthi kulamabhizimusi angafuni ukusebenza lamalunga ekomithi enkulu ngoba besesaba ukuthi imali yabo ingatshabalala. Nxa sesilabantu ababona ngokudinga imali, abangekho kukhomithi yethu kuzaletha ukwethembana phakathi komdlalo lamabhizimusi.”
Kusenjalo, inhlanganiso yeBasketball Union of Zimbabwe (BUZ) iyaphambili ngokusungula umncintiswano omutsha ohlanganisa amathimu akumaligi akumhlubulo ongezansi yelizwe.
UJoe Mujuru isikhulu seBUZ ubike ukuba amathimu azadlala phakathi komnyaka loba babehlele ukuthi kuzancintiswanwa ngenyanga kaMabasa.
Ngomnyaka odluleyo, uMujuru watshela uMthunywa ukuthi ukuhlanganiswa kwamathimu lokhu kuzayengeza isisindo somdlalo wabo.
“Injongo yokubumba imIncintiswano entsha ngeyokuthi sibonakalise ithalenta lethu, kube lula ukuthi sikhethe abadlali abazangena kuqembu elidlalela isizwe.”