uMthunywa
Innocent Kurira
UMGCINISIHLALO weHighlanders uJohnfat Sibanda ubika ukuthi akula okuzaphazamisa iqembu labo loba nje sekusaziwa ukuthi abadlali abane sebesiya kwamanye amaqembu.
USibanda uthe abethuswa yilutho ngoba bahleli beqoqekile ngamalungiselelo esizini ezayo.
IZimpapers Sports Hub iyakuveza ukuba abadlali abazasuka kuHighlanders nguMbongeni “Mbola” Ndlovu, Peter Muduhwa, Andrew Mbeba loBrighton Manhire.
Abadlali laba bavumela ukudlalela iHighlanders kuze kuyefika umhlaka 31 Mpalakazi lonyaka.
Ngokudingisisa kwentatheli, kukhanya iHighlanders idonsela emuva ekuvuseleleni izivumelwano.Abanye abadlali abalakho ukusuka eqenjini ngu-Andrew Tandi, Rahman Kutsanzira loRay Lunga.
Iqembu lisanda kuqhatsha umqeqetshi uKelvin Kaindu kodwa lithule zwi ngokubumba iqembu lesizini ezayo.
Kubikwa inkinga engabe ihlasele iqembu ngeyemali, nanko usekelo lwenkampani yeSakunda alukabekwa sobala ngomnyaka ozayo.
USibanda uthe basakhulumisana labadlali babo ngakho akulasizatho sokuthi abalandeli bethuke.
“Akukadingeki ukuthi sitatazele lapha. Yonke into ihamba ngendlela,” kutsho uSibanda.
Uthe okunye kungaba ngamahemuhemu ngoba izisebenzi zeqembu kunye lomaqhuzu, babika ukuba akulankinga eqenjini.
“Ngikhuluma nje ihofisi ivuliwe, kuyasetshenzwa. Ngihlala ngikhuluma lomaqhuzu wethu njalo kakaze ayiveze eyokuthi silenkinga ekhaya.
“Nxa kulenkinga sizakwazisa amalunga eqembu ngoba yibo abanikazi bethimu.”
Kusenjalo, abalandeli sebelinde ukuthi uSibanda lequla le-executive baqinisekise ukuthi uKaindu uyasaniya ukuzosebenzela iqembu. Umqeqetshi lo kubikwa kwakhulunyiswana laye kodwa akuzange kwacaca.
