uMthunywa
Innocent Kurira
UMDLALI wenguqu uBrian “Gaucho” Ndlovu sekusele kancane ukuthi avume ukudlalela iqembu leHighlanders.
UNdlovu, obedlalela iqembu leAdachi ngesizini edluleyo, okwamanje ulilunga leBosso njalo kuzwakala ukuba umdlalo wakhe ujabulisa abaqeqetshi.
Umdlali lo, odume ngelithi Gaucho, uyenelisa njalo ukudlala egijima eceleni lasesiswini senkundla. Wahlohlela i-Adachi amabhola ayisithupha ngo2023.
Umfakazi oqotho oseduzane lokwenzakala kuHighlanders, uncwebe intatheli yeZimpapers Sports Hub ukuthi sekuseduzane ukuthi uNdlovu afake isayinetsha (signature) ephepheni, abengumdlali waleliqembu.
“Usehlale phansi labadala beqembu. Isimemezelo sesivumelwano sakhe leHighlanders singaphuma loba nini. Sikhangelele ukuthi kusiyaphela iviki le kumbe ngoMvulo, abasekeli beqembu bazatshelwa ngalokhu,” kutsho umfakazi lo.
UNdlovu uzabe engumdlali wesihlanu ukungena kuHighlanders lonyaka.
Abanye abadlali nguMarvin Sibanda ozadlala okwamasizini amathathu. Umdlali lo, oleminyaka engu- 25 yokuzalwa njalo ubedlalela iLittle Rock Rangers FC eMelika.
I-Bosso isayine uReason Sibanda obeku-Arenel loBrian Mlotshwa oweHwange. USibanda wahlohla amabhola ayisitshiya galombili, wabayinsika yokunqoba kwe-Arenel, yona ezachinsa ukudlala kuligi ephakemeyo eyePSL lonyaka.
Umgadli uCalvin Chigonero, obebolekwe kuqembu le-Talen Vision, laye ngomunye wabadlali abavumelane ukubayingxenye yeHighlanders.
Iqembu lehlukane loStanley Ngala loWashington Navaya ngoLwesihlanu ngeviki edluleyo. Bobabili babedlala bengabagadli kodwa bahlohla amabhola amabili munye ngamunye.
Ngesizini edluleyo, iHighlanders yahlohla amabhola angu-24, kumidlalo engu-34.