uMthunywa
Nkosilathi Sibanda
NGESONTO amalunga eHighlanders azasebenzisa amalungelo awo ngokuphatheka kukhetho lwezikhundla zikamgcinisihlalo, unobhala kunye leselunga lekomithi.
Izikhundla lezi zincintiswa ngamadoda ayisitshiya galolunye.
Kulabo abafuna ukuvotelwa kumgcinisihlalo kuloJohnfat Sibanda, Nodumo Nyathi, Kenneth Mhlophe loEddison Dube. Abathathu abakumbango wobunobhala nguRaerburn Ndebele, Morgen Dube loNsikelelo Advovo Mafa Moyo. UBhekumuzi Sibanda loKindman Ndlovu badinga ivoti kusikhundla selunga lekomithi. Ngokunjalo, kuliviki silethulela imibono lalokhu okuthenjiswa ngamadoda la afuna ukuvotelwa “kuthimu yezwe lonke”.
Kenneth Mhlophe:
Ngokutsho kukaMhlophe, engakhethwa, akulanto engaphazamisa ukuphumelela kweqembu ngoba indlela yokunqoba uzayiphendla. Uthi indlela zimhlophe ngaye.
UMhlophe ungena kukhetho okwesibili njalo wake waba ngumgcinisihlalo. Wanqotshwa nguSibanda ngo2021.
“Ngizethula kini njengenceku yenu. Asibambisaneni kumsebenzi wokuvusa iqembu lethu.
“Indlela zimhlophe sisiyaphambili. Makube njalo maBosso amahle. Khethani mina,” kutsho uMhlophe ophinda abengusomabhizimusi olodumo elizweni.
Johnfat Sibanda:
“Umlayezo wami ngowokuthi kumele sibambane ngalesi isikhathi. Lokhu sikwenzela iHighlanders ngoba iHighlanders kumele kube yiyo enqobayo ngemva kokhetho.”
Ngaphansi kobukhokheli bakhe, uSibanda wakubona ukuthi kuyavuselelwa indlu yokuzikholisela i-clubhouse, iHighlanders Royals, eyamantombazana lokuvusa umgodi wamanzi.
Edison Dube:
UDube waziwa njengomhlonitshwa kumisebenzi yamabhanga. Kudala wabalilunga leHighlanders.
“Ngike ngaba yisisebenzi samabhanga. Ngazalelwa ngakhulela koBulawayo. Ngililunga ngiphinde ngibe ngumlandeli weHighlanders omkhulu. Khathesi ngibanga isikhundla sikamgcinisihlalo ukuze ngivule yonke imigoqo ebilokhu isenza ukuthi iqembu lithwale nzima,” kutsho uDube.
Uthembise ukuhlanganisa wonke amalunga labasekeli beHighlanders abakuleli labaphetsheya.
Nodumo Nyathi:
UNyathi ungena kukhetho ehamba ngomkhankaso othi “Umbono ucacile”.
Indoda le isithole uthando kunengi labasekeli lamalunga eHighlanders alombono wokuthi iqembu kumele likhokhelwe ngumuntu osakhulayo. Amalunga asekela uNodumo athi asediniwe ngokukhokhelwa “ngamakhehla”.
Raerburn Ndebele:
“Sifuna ukubona ukwehlukaniswa kwamandla, okokuqala sibelehofisi likanobhala okufanele linikezwe amandla. UNdebele uthe kufanele kuqiniswe isiko leHighlanders, iqembu lingathengi abadlali ngaphandle kodwa lithuthukise abalo. Unikeze umzekeliso wabadlali bakudala ababalisa uZephania Ngodzo, Kenneth “Dokoza” Msimanga kunye loVusa Nyoni. “Bekungenzima ukuthi bafakwe eqenjini njengoba bebelwazi usiko lweqembu.” UNdebele uthe amalunga kumele anikezwe amathuba alinganayo ukuze enze imisebenzi yeqembu.
Morgen Dube:
Lo udinga ivoti okwesibili esikhundleni sikanobhala njalo ubika ukuba kuzamele aphenduke ukuze aqede lokho ayesekuqalile eqenjini.
“Amaphurojekithi amanengi kanobhutshuzwayo angeke aphutshe phakathi kweminyaka emibili. Sidinga isikhathi esengeziweyo sokwenza amanye amaphurojekithi esiwaqalileyo njengenkokheli.
Engingakwenza njengonobhala yikuqinisekisa ukuthi silabasebenzi abafaneleyo ehofisini lasebholeni. Besilokhu sizama ukugcwalisa lezi zinto eminyakeni emithathu edluleyo nanko futhi sesilesisebenzi esibambe ihofisi yezokuthengiselana,” kutsho uDube.
“Ngikholelwa ekuphakamiseni abadlali bethu. I-Highlanders idinga ukuthi ibe lesitolo sayo esikhulu.Ngakho-ke lokhu kunye le-academy yimisebenzi emibili engikholwa ukuthi ingatholisa iHighlanders imali.”
Nsikelelo Mafa Moyo:
“Njengoba kunje, isisekelo sombuso seHighlanders silamaphutha amanengi. Sidinga ukulungiswa ngokupheleleyo. Thatha isibonelo njengakhathesi, kulenkinga yemibala yezikipa zeqembu. Isisekelo sombuso sithi imibala yeHighlanders izakuba ngomnyama lomhlophe kodwa, leyomibala kayihambisani lemithetho yePremier Soccer League leConfederation of African Football ethi kumele kube lama-kit amathathu alemibala etshiyeneyo. Ngakho isisekelo sombuso kumele sihambisane lenhlanganiso ezitshiyeneyo esizikhokhelayo,” kutsho uMoyo kungxoxo leZimpapers Sports Hub kuliviki.
Kindman Ndlovu:
“Ngimele intsha, amalunga azinikeleyo, alothando ngeqembu leli, afuna impumelelo. Ngizimisele. Ngiza lomqondo omutsha ozaphakamisa inhlelo zeqembu,” kutsho uNdlovu.
Uthi indlela akhankasa ngayo itshengisa inguquko.
“Isitayila sami somkhankaso sihlukile. Ngizama ngakho konke okusemandleni ami ukwenza konke okuhambisana leqembu ngezinga eliphezulu”
Bhekumuzi Sibanda:
“Ukuncedisa kwami iqembu akukaze kuvele ekuthini ngifuna ukuvotelwa esikhundleni kodwa kungenxa yesifiso sami sokubona ukuthi iqembu liyaphumelela. Ngigqugquzelwa ukwengeza okuthile eqenjini.
“Kungenxa yalokhu, yikho ngifuna ukuthi ngamukele isicelo esivela kwamanye amalunga eqembu ukuthi ngiphinde ngingene kukhetho,” kutsho uSibanda.
