‘Kayivalelwe phandle iZim’

23 Nov, 2023 - 00:11 0 Views
‘Kayivalelwe phandle iZim’ uHugo Broos

uMthunywa

UMQEQETSHI weBafana Bafana, uHugo Broos, uthe inhlanganiso yeConfederations of African Football (Caf) kumele ivalele phandle amazwe afana leZimbabwe ayehluleka ukuphatha imidlalo ngenxa yokuswela inkundla ezifaneleyo.

AmaWarriors abephakathi kwamaqembu alitshumi lasikhombisa adlalele enkundleni ezingaphandle kwamazwe ayo kumidlalo yokukhankasela ukuya kunkezo yomhlaba ka-2026.

Iqembu lesizwe lisebenzise iHuye Stadium eButare, eRwanda kumidlalo yalo yekhaya kuqula lika-Group C leNigeria ngeSonto.

Elinye iqembu likaGroup C,  iLesotho, lidlale umdlalo walo leBenin eMoses Mabhida Stadium ngoLwesibili, eSouth Africa.

Ngokutsho komqeqetshi uHugo Broos, indlela engcono yokuxazulula udubo lwenkundla yikuvimba amazwe la angelazo inkundla ezifaneleyo.

“Le yinto eyodwa engingayiqondisisi kakuhle kubhola lezwelazi le-Africa ukuthi imidlalo yasekhaya akusiyo imidlalo yasekhaya,” kutsho uBroos, ekhuluma lentatheli eseSouth Africa kuliviki.

“Ngicabanga ukuthi iZimbabwe izadlala imidlalo yayo yasekhaya eSouth Africa, ngakho-ke silethuba elihle kulumdlalo. Engakubona esikhathini esidluleyo yisibonelo. ILiberia idlale umdlalo wayo wasekhaya eMorocco, ngiyaxolisa kakhulu kodwa lokhu akulunganga. Ngicabanga ukuthi iCaf kumele yenze okuthile ngalokhu.

“Ngiyazi ukuthi akulula ukuthi lawo mazwe abe lenkundla ezifaneleyo ngoba kusuke kube yindaba yemali, kodwa nxa kungathiwa aphiwe iminyaka emihlanu kwakhiwe inkundla, kungaba lotshintsho.”

Uqhubeke wathi: “Kodwa nxa iCaf ingatsho lutho bese kutsho ukuthi umncintiswano kawusaphelelanga.”

Kusenjalo, amaWarriors aphendukile ekhaya ngemva kokudlala leRwanda nge 0-0. Umdlalo obuphakathi kweZimbabwe leNigeria uphele kuyi 1-1. —Ebulenjini 

Share This:

Sponsored Links