uMthunywa
Fungai Muderere
ABAQEQETSHI bamaqembu enguqu adlala kuligi yeCastle Lager bakhonona behlabela ingoma eyodwa ethi, balahliswa ngabadlali babo abehluleka ukuhlohla.
Loba sekudlalwe amahlandla amabili emidlalo lokhe kuvulwe isizini yalonyaka, abaqeqetshi sebehlabe isililo ngendlela abagadli labanye abadlali ababuthundu ngayo phambi kwegedi.
Lesi isikhalazo sasivele sikhona lakumkhankaso odluleyo kuligi efanayo. Okwakhathesi kuyethusa ngoba abaqeqetshi sebeveze ukukhathazeka kwabo ngemidlalo emibili kuphela.
Kumaviki amabili emidlalo, sekuhlohlwe amabhola angu-35. Ngeviki lokuvulwa kwesizini, kwahlohlwa amabhola angu-18, kweyesibili kugaxwe angu-17 entanjeni.
Umsekeli kamqeqetshi weChicken Inn uFungai Tostao Kwashi ngowakuqala ukubeka isikhalazo sakhe.
IChicken Inn isihlohle amabhola amabili. Yanqoba 2-1 phezulu kweCAPS United kumdlalo wakuqala, kowesibili yabanjwa nge 0-0 yi-Arenel Movers.
“Kulendawo okumele sizilungise, ikakhulu phambili kwenkundla kubagadli bethu. Amabhola kumele ahlohlwe njalo ukuze kube njalo, kumele abagadli baphiwe amabhola phambili.
“Nxa sifuna ukuyaphambili kumele sinqobe. Emdlalweni webhola lenyawo ukuhlohla yikunqoba. Kasilandanga ukuzodlala lapha. Abadlali umsebenzi wabo ngowokudlalela ukunqoba, ngaphandle kwalokhu kuyabe kufana lokudlalela ukuzithokozisa,” kutsho uKwashi.
Lomqeqetshi we-Arenel Movers, uFarai Tawachera ukhale ngokufanayo, esithi abadlali bakhe bayamdanisa.
Iqembu leli, elitsha kuligi yeCastle Lager, lidume ngebizo elithi “The Sweet Boys, Abafana beziwiji”.
Ekhuluma leZimpapers Sports Hub ngoLwesibili emini, uTawachera uthe inkinga abalayo yikudlalisa ibhola esiswini senkundla.
“Sehluleka ukufikisa ibhola kubagadli bethu. Liphutha lelo ngoba ibhola siyalithola kodwa kukhanya kuyala ukuthi lifike phambili,” nguTawachera lo. I-Arenel kumidlalo yayo emibili itshengise ukuthi izilungiselele ukumisana “lezinkulu” kuligi ephakemeyo nanko amaqembu edlale lawo, iNgezi Platinum leChicken Inn zehluleka ukuyihlohla.
Amanye amaqembu alokhe esadinga amabhola ngemva kwamambule yiNgezi Platinum Stars, Yadah Stars, Herentals College leChegutu Pirates.
Kusenjalo, kumbiko ovela emahofisini ePSL, iqembu leBikita Minerals yilo eselizadlala umdlalo walo wakuqala leHerentals College, ngemva kwalokho lizadlala leYadah Stars.
