uMthunywa
Fungai Muderere
U-LUKE Mnkandla, umgcinisihlalo webhodi yeHighlanders usecele ukuthula lokubambana kuleliqembu, wakhuza ukuthi kubi lokukhombana ngeminwe lokusolana.
“Kunengi okukhulunywayo, kulensolo zokuthi ibhodi yeHighlanders iyaxokozela ekuqhatsheni abaqeqetshi. Sekukubi kakhulu ngoba insolo zibhekiswe ebantwini abafana lami. Angikaze ngikwenze lokho futhi ibhodi kayizake ikwenze lokho. Loba singakwenza lokho kuyabe kuyisiqondiso sekomithi yequla le-executive. Asikho isikhathi lapho engake ngaxokozela ekutheni kuqhatshwe uphi umqeqetshi,” kutsho uMnkandla kumalunga eqembu ahlangane ngeSonto edluleyo.
Uvumile ukuthi bekulokudonsela emuva lokungazwani obesekukhona ngesizini edluleyo phakathi kwebhodi lequla le-executive.
“Kubonakale ngesigaba sokuqala somnyaka ka-2023 ukuthi kulokungaboni ngaso linye phakathi kwekomithi ye-executive lebhodi labaqondisi. Ukungaboni ngaso linye kwakubangelwa yikungabi khona kokuxhumana okuphumelelayo kunye lokungathembani. Ukwehluleka ukwazisa indima kumaqula womabili isizatho esidale ukungathembani.
Kumele kukhunjulwe ukuthi umhlangano we-AGM ka2023 ibhodi yenza isibopho sokuthi sizalungisa lesi simo ukuze kusetshenzwe ngokuzwisisana,” kutsho uMnkandla.
Uzigeze izandla ngensolo ezivela kwamanye amalunga athi yena uyaxokozela.
“Kusukela ngensuku zikaMandla Mpofu, Henrik Pieter de Jong kanye loMark Harrison sasingela mbono. NgoBaltemar Brito lo-Antonio Torres abahambe ngomnyaka odluleyo, ngatshelwa kuphela ukuthi sebefike egcekeni lendizamtshina.
“Ngabuzwa ukuthi ngikhululekile yini ukuthi ngihambe ngiyebalanda, ngala. Ngahlangana labo ehofisini kuphela. Mayelana loKelvin Kaindu, i-executive ingitshele nje ukuthi bebekhuluma laye.
Ukuxhumana okwalandelayo, ngezwa ukuthi sebevumelane laye. Omunye umuntu oseNew York wangibuza ukuthi kuliqiniso yini ukuthi ngiyaxokozela ekuqhatsheni abaqeqetshi. Kubi lokho njengoba ngike ngabizwa ngamagama amanengi. Zinhlamba zodwa,” kutsho uMnkandla.
