uMthunywa
Lovemore Dube
UMSAKAZI wakoBulawayo uLee Mangena usenconywe ngomunye wabadlali bePremier Soccer League ngokumendlalela ikusasa lakhe esakhula.
UMangena odume ngelithi Sporo, wasungula iqembu leStreet Set kuminyaka engaba litshumi lanhlanu elokitshini leNketa ngemva kokubona ukuthi abasakhulayo baswela usekelo. Wahlanganisa abafana lamankazana.
UNedrick Madeya obengunozinti weHwange FC kumnyaka osanda kudlula uthe uMangena kumele abe ngomunye wabantu bakoBulawayo okumele babongwe besaphila.
“Sokuyimvama ukuthi umuntu esefile kufakwa amaluba akhe kukhulunywe okuhle ngaye. Kukanti kuhle ukuthi umuntu azizwele esaphila enconywa.
“UMangena wenza umsebenzi omuhle ezigabeni zeNkulumane, Nketa leMganwini esipha abasakhulayo ithuba lokuthi basuke ezitolo, emigwaqweni kanye lemabholohweni bazinikele ebholeni lapho abaqinisa imizimba bazame elinye ikusasa elingasilo lokufunda kungelesipho somuntu asiphiwa nguNkulunkulu,” kutsho uMadeya exoxisana loMthunywa ngoLwesibili.
UMadeya, obelomnyaka omuhle eHwange ngokudlala imidlalo elitshumi lantathu engahlohlwa, uthe wazane loMangena esasengumfana omncane wadlala kumaUnder-13 engumgadli kwathi esekuma
Under-18 wayesengunozinti ekhathazwa nguMangena loLarry Gwati weLG Foods onguye owamenza wadlala kubanga likaDivision Two lapho abonwa yi-Highlanders.
UMadeya uthi banengi asebedlule kuMangena njalo kuqakathekile ukuthi abantu bangakhohlwa lapho abavela khona.
“Ngiyake ngizibuze ukuthi ngobunengi bethu abadlalayo siyake sikhumbule ekhaya, sikhumbule lapho esivela khona sijikele amabhola lokunye sibonga njalo sikhuthaza ukuthi ngabe kuba lomunye ohlumayo alandele thina esagijima ngaphambilini ngoba siyizibonelo ezimele zibenhle,” kutsho uMadeya esithi yena uyazibongela ngoba kundima yakhe uMangena kaswelakali ngoba umgqugquzele.
Banengi abaphandle asebephakamise isizwe abalindele ukubongwa bengafuni lasenti yomuntu ngoba bephiwe kukho lokho.
Lanxa nje edonsa nzima minyaka yonke uMangena, ethathelwa abadlali engabhadalwa, kodwa uhlezi elesifiso sokuphakamisa abafana.
