uMthunywa
UMDLALI wasesiswini weKaizer Chiefs, uWillard “Salt and Vinegar” Katsande, akakugqizi qhakala okutshiwo ngabalandeli beqembu abafuna axotshwe ngoba bethi akasela lutho emdlalweni.
UKatsande ngomunye wabadlali asebehlale isikhathi eside eNaturena, ozaziyo insuku zenala ngaphansi komqeqetshi uStuart Baxter lokuhlupheka ngaphansi kukaSteve “Mphathi” Komphela.
IChiefs iqede isizini yesine ingayinqobanga inkezo. Abalandeli bafaka insolo kubaphathi ngokuthi baxotshe abadlali abathize, lakhiwe kakutsha iqembu ngoba sebekhathele ukuphenduka inhlekisa. Kulaba abadlali kubalwa laye uKatsande.
Amakhosi asevele atshengisa indlela uVirgil Vries, Kgotso Malope, Bhongolwethu Jayiya, Hendrick Ekstein loRyan Moon.
“Ngiyakwamukela konke. Kade ngafika ebholeni futhi ngilesikhathi eside ngikuleli iqembu futhi ngiyakwazi ukuthi kunjani ukuwina. Kulula ukukhoba iminwe ngakithi ngoba singabadlali abadala eqenjini. Uma izinto zingahambi kahle kunjalo. Akungikhathazi okutshiwo ngabalandeli ngoba baphatheke kabi ngoba sehlulekile ukuwina inkezo kumasizini amane edluleyo. Balegunya, siyabahlonipha futhi ngeke ungizwe ngibaphendula kabi.
“Ngingabatshela ukuthi empeleni bakhuluma iqiniso, asikwenzanga okusemandleni ethu kodwa ngeke sisakwazi ukutshintsha osekwenzekile,” kutsho uKatsande.
Amakhosi ahluleke ukuwina inkezo sebethembile abalandeli ngesikhathi ekhala ngaphansi kweTS Galaxy edlala kuNational First Division (NFD) kunkezo ye-Nedbank Cup eThekwini.
Ngaphandle kokukhomba ngomunwe abadlali abathize, abalandeli beChiefs bafuna akhonjwe indlela umqeqetshi uErnst Middendorp ngoba bakholwa ukuthi akukho angakwenzela iqembu.
Ngemuva kokuhlulwa kweChiefs koweNedbank, uMiddendorp uthe uzobhunga ngekusasa lakhe labaphathi phezu kokuba elesivumelwano seminyaka emibili.
“Indaba yomqeqetshi angikwazi ukuyiphawula ngoba iphakathi kwakhe labaphathi.Thina asilayo inkinga lomqeqetshi, siyamsekela. Umsebenzi womqeqetshi yikusihlomisa ngamaqhinga lendlela okufanele sidlale ngayo. Kukithi ukuthi siyakwenza yini lokho. Simenzele phansi singadlali,” kutsho uKatsande.
IChiefs izoqala amalungiselelo esizini entsha ngasekupheleni kwenyanga. Izadibana le-Orlando Pirates koweCarling Black Label Cup ngoNtulikazi 27 eFNB Stadium, eGauteng.
— Ubulembu
