uMthunywa
NGITHEMBA ngilithola kahle bafundi abahle, seliphezu kwawo amabhuku ngoba phela ukuze ube lekusasa engcono kumele umuntu abophe ziqine. Lamuhla-ke bafundi sizake sikhangele ulimi, sijulise ingqondo sikhangela amabizo akhomba abantu abathize. Lapha ngithi kesikhumbuzane kulokhu.
Amabizo akhomba abantu abathize.
1. Umuntu ongathembekanga — liqili.
2. Umuntu owenza umsebenzi ngokudonda — livila.
3. Umuntu ogula njalo — yisicubu.
4. Umuntu ongaboniyo — yisiphofu.
5. Umuntu ongezwayo endlebeni — yisacuthe.
6. Umuntu ocathamela abanye emangweni efuna ukubenza kubi — yisigebengu.
7. Umuntu ogidela izulu — yiwosana.
8. Umuntu ongelandawo eqondileyo yokuhlala — ngumhambuma.
9. Umuntu oncitshana lokudla — yisihwaba/ligovu.
10. Umntwana wokuqala endlini yakwabo — lizibulo/ ingqabutho.
11. Umntwana wokucina endlini yakwabo — licinathunjana/ yisicino.
12. Indodana yokuqala yendlini enkulu — yindlalifa.
13. Umntakadadewethu (wena uyindoda) — ngumzukulu.
14. Umntakadadewethu (wena ungumfazi) — ngumntanakho.
15. Umnewabo loba umnawakhe womkakho (wena uyindoda) — ngubabazala.
16. Umkadadewethu — ngumkhwenyethu.
17. Umntwana womfazi ongazalwa lapha endele khona ehlala laye — lizalizelwe.
18. Umnewabo kanyoko — ngumalume.
19. Umzawakhe kababa oyindoda — ngubaba.
20. Umzawakhe kababa ongumfazi — ngubabakazi.
21. Isalukazi esizala ubaba loba umama — ngugogo.
22. Umuntu wesifazana osanda kubeletha — ngumdlezane.
23. Umuntu odla asuthiswe yikundla okulutshwane — yinculu.
24. Ijaha elikhonjwa zintombi ezinengi — lisoka/yinkonjwa.
25. Umuntu osebenzisa izandla zonke ngokufananayo — likhabe.
26. Izingane ezizelwe zambili sikhathi sinye — ngamawele /ngamaphahla/amabhuka.
27. Umuntu ogada isambane — ngumthakathi.
28. Umuntu onuka abathakathi — yisanuse.
29. Intombi eseyake yazala — limitha.
30. Umuntu owelapha abagulayo esebenzisa izihlahla — yinyanga.
31. Umuntu osebenzisa isandla sokhohlo — yinxele.
32. Umuntu owelama amawele — lifusi.
33. Ijaha elidala elingathathanga — yinsumbelume.
34. Umntakayihlokazi loba okamalumakho — ngumzawakho.
35. Ijaha elingakhonjwayo — yisigwadi.
36. Umuntu odla yonke into ahlangana layo — ngumphiphambi.
37. Abantu besinye isizwe abazothathela izimfihlo zelizwe lakini — zinhloli.
Sizakuma lapha okwalamuhla bafundi, libe lesikhathi esihle.