uMthunywa
Siyahlangana njalo bafundi kule iviki ngithemba lonke lijabulile njalo lizimisele ukusebenza nzima ukuze ekucineni lithole imivuzo emihle. Sidibana-ke sikhangela ngezolimi lwethu, phela isizwe yisizwe ngolimi lwaso. Lamuhla ngizathanda ukuthi kesikhangele ulimi lwezaga.
Lolu ulimi lwenza inkulumo ithathekise kolaleleyo lobalayo. Kuhle-ke ukuba abafundi bazazi izaga kanye lengcazelo zazo ukuze bazisebenzise lapho okumele zisebenze khona hatshi ukuphosela nje ingqe yisaga kunkulumo.
Kwesinye isikhathi ungacelwa ukuba uphe ingcazelo yesaga loba utsho ukuba isaga sisetshenziswa nxa kutheni.
Kuqakathekile ukuba uzwisise umbuzo ukuze uphe impendulo ezifaneleyo.
Zisetshenziswa nxa kutheni izaga ezilandelayo?
Nxa uphiwe umbuzo onje awuphi ingcazelo yesaga kodwa uyaveza ukuthi size sisetshenziswe leso saga kuyabe kuvele kutheni. Kungabe kuxwayiswa, kukhuzwa kubongwa kubikwa njalonjalo.
Kesikhangele izaga ezilandelayo:-
1. Lixhotshwa libhekile — Sisetshenziswa nxa kuxwayiswa umuntu othi uqaphele akulalutho olungenzeka ukuba angaze azikhohlisa ngokuthi uqaphele ngoba ingozi ingamehlela kunjalo.
2. Ungadinwa lakusasa — Sisetshenziswa nxa kubongwa umuntu owenze into enhle komunye ekhuthazwa ukuba angaze akwenza mhlalokho kuphela akwenze kokuphela.
3. Akuqili lazikhotha emhlane — Sisetshenziswa nxa kukhuzwa umuntu ozenza yena ohlakaniphileyo owenza izinto ezimbi angaze abanjwa ukuba lizakuba khona ilanga lapho ubuqili bakhe obuzovela khona egcekeni.
4. Eyemzini ziyayihlaba — Sisetshenziswa nxa kuqiniswa umuntu osebhekane lobunzima ngento entsha ayiqalisileyo ukuba angadeli ngoba ukuqalisa kuvele kunzima kodwa kuzalunga ngokuya kwesikhathi.
5. Indwangu zihlekana iziphongo — Sisetshenziswa nxa kuxwayiswa umuntu ohleka ububi bomunye ukuba angaze amhleka ngoba belezenzo ezifananayo nje.
6. Umuntu abozinuka amakhwapha — Sisetshenziswa nxa kucetshiswa umuntu ozenza yena ongenzi amaphutha ukuba wonke umuntu ulawo amaphutha ngakho kumele umuntu aqale ananzelele awakhe amaphutha engakakhombi awabanye.
7. Ukhanka uthole inkumba — Sisetshenziswa nxa kubatshazwa loba kukhulunywa ngomuntu ongumyanga osuke wehlelwa yinhlanhla engayilindele.
8.Umthwentwe uhlaba usamila — umntwana uhle atshengise ngezenzo zakhe esemncane ukuthi uzakhula abe ngumntwana onjani.
9. Isigogo sigoqwa sisemanzi — umntwana ulaywa esemncane.
10. Ikhuba lomunye alilandima — ungathembi ulutho lomunye umuntu ngoba kungenzeka usalusebenzisa umnikazi azoluthatha.
11. Indlela ibuzwa kwabaphambili — ulutho ongalwaziyo lubuze kwabalolwazi.
12. Akuyiwa nganxanye kungesimanzi — abantu ngemvelo abaze bavumelana kulutho oluthile, balembono etshiyeneyo.
13. Isitsha esitsha kasidleli — kufe umuntu obeloncedo kakhulu ebantwini ngesikhathi esifitshane.
14. Elempofana lizwiwa muva — umuntu ongumyanga kumbe odelelwayo kalalelwa nxa kukhulunywa kumbe lokho akutshoyo kuthathelwa khatshana izinto sezonakele.
