uMthunywa
Imisebenzi kaGrade 7
Linjani bafundi abahle? Kuhle njalo ukuhlangana lani liphilile sikhangele umsebenzi wesikolo.
Ngizaqala ngokulipha impendulo zeviki ephelileyo.
Kuqakathekile ukwazi ulimi oluqondileyo ukuze siluthuthukise njalo lani ngelinye ilanga bafundi lizabe selingabazali selincedisa abantwabenu. Nanzi impendulo zeviki eledluleyo. Umsebenzi wakuqala
1 Ngumsingisane
2 Yisikhaba
3 Ngomthala
4 Yimizi
5 Luqunga
6 Nngomantsentsane
7 Yimizi
8 Yimizi
Yizo impendulo zemsebenzi wakuqala bafundi. Asazini imihlobo yotshani obutholakala elizweni lakithi.
Nanzi impendulo zomsebenzi wesibili.
1 Isihlalo
2 Umlola
3 Ugwalo
4 Ifasitela
5 Ibutho
6 Usiba
7 Umfanekiso
8 Amaluba
9 Ingxenye
10 Ivinkili
11 Umahluli
12 Intuba
Lamhlanje ngizathanda ukuthi sikhulume ngencwadi kodwa-ke sizakhangela i-business letter ngesilungu.
Lincwadi yile esiyibhala nxa sidinga umsebenzi kumbe sidinga indawo zesikolo kumbe nxa silezikhalazo ezithile.
Lowu-ke umhlobo wencwadi wahlukile kancane okwakuqala ubalamakheli (address) amabili eyakuqala ngeyakho.
Ungakhohlwa ukuthi ikheli ayila bongqe labo kopi njalo. Ungaqeda ukubhala ikheli lakho uyeqa umzila ubusubhala ilanga lenyanga lomnyaka ungaqeda lokhu uyeqa njalo umzila ubusubhala ikheli lesibili leli likheli lalapho obhalela khona, nxa usuqedile ukubhala ikheli lesibili uyeqa umzila ubusubhala ukuthi incwadi iya kubani (Dear Sir/Madam) kodwa ngesintu sithi Kuwe Mnumzana kumbe Nkosikazi.
Nxa usuthe waqeda lapha uyeqa njalo umzila ubusubhala i-reference isithi ngamafitshane (Ref) ubususitsho ukuthi ubhala ngani, kungaba yikudinga indawo kumbe udinga umsebenzi kumbe uyasola ulutho oluthile.
Ungaqeda lokhu kumele weqe njalo umzila ubusuqalisa ukubhala incwadi yakho ngalokho obhala ngakho ngokugcweleyo. Okuqakathekileyo usuzachaza ngokugcweleyo ukuthi obalayo angadingi ukuthi ufuna ukubhala ngani.
Nxa kade udinga indawo yesikolo kumbe umsebenzi usuzakuthi kusigaba sokucina utsho amaphepha akho owafakileyo, izithupha zokufunda njalo njalo kusiya ngokuthi ukhuluma ngani.
Nxa ubhala incwadi yakho ungakhohlwa izigaba zakho usuthe waqeda isigaba sokucina ubususeqa njalo umzila usuvalelisa isibonelo “Yimi ozithobileyo”.
Weqa njalo umzila ususitsho ukuthi ungubani. Nxa usubhala ibizo lakho ubhala lesibongo sakho ukhumbule ukuthi ubhalela abantu abangakwaziyo ngakho kuqakathekile ukuthi ufake lesibongo sakho.
a Qaphela ukuthi kulo umhlobo wencwadi awubingeleli ngoba abakwazi.
b Okwesibili bhala ngamafitshane usitsho ukuthi ufunani ungabhodabhodi.
c Okwesithathu ikheli lakho liqakathekile ukuze nxa befuna ukukuphendula banelise ukwenza lokhu.
d Okwesine i-reference (Ref) iqakathekile ukuze babekwazi ukuthi uvele ufunani kumbe ubhala ngani.
Ngilethemba lokuthi ungalandela lindlela esikhulume ngayo uyaphuma layo (i-business letter). Sizahlangana njalo ngeviki elizayo ngoba ukufunda akupheli.
