uMthunywa
YiNtatheli kaMthunywa
INHLANGANISO yeZimbabwe Football Association ikhuphe umbiko wokuthi ngesizini ka2017, iligi ephakemeyo eye-PSL izadlalelwa ngamaqembu alitshumi lasitshiyagalombili.
Lokhu kulakho ukuqala eyinye impi phakathi kweZifa lenkokheli zamaqembu atshibilika kuPSL. Kungakaphumi umbiko lo ovele kuZifa, udaba lolu beseludonselwe kumthethwandaba wezemidlalo odume ngokuthi yiCourt of Abitration for Sport.
Ukungezwani kweZifa lePSL kudale ukuthi umongameli weZifa uPhilip Chiyangwa amise umsebenzi uPeter Dube umgcinisihlalo wequla lePSL.
IZifa yiyo elawula konke okwenzakala kunguqu kuleli.
Ngokuphuma kombiko womhlangano wangempelasonto, munye umbuzo osemlonyeni wababukeli labalandeli benguqu yePSL. Impi izaphela nini kunhlanganiso zombili?
Umbiko wangempelaviki edluleyo lo uzwakale kuhle endlebeni zeqembu leTsholotsho FC eselisinde ukuxotshwa kuligi yezinkulu okwesibili iminyaka ilandelana loba nje lingadlali okuthabisayo. Leqembu leChapungu litshaya imvokloklo ngoba lalo selisinde ekuganyulweni kuligi ephakemeyo.
Iziqholo zeZhwane zinikezwe ithuba elitsha lokugiqika labanye abafana bePSL. Isinqumo seZifa lesi sitsho ukuba kuzaphuma amaqembu amabili adliwe kusizini edluleyo; iMutare City leBorder Strikers. Amaqembu aphumelele kumaligi kaDivision One azadlala kuPSL yiBantu Rovers, iShabanie, iYadah Gunners leBlack Rhinos. Incwadi emumethe isivumelwano seZifa ethunyelwe uMthunywa kuliviki iveza ukuthi amalunga eZifa la avotele ukuthi ayengeze inani lamalunga ahlala phansi kwequla leZifa Assembly. Endaweni yokuthi iZifa imelwe ngamalunga angu-62, isizamelwa yi-64.
“Amalunga eZimbabwe Football Association enze umhlangano mhlaka 7 kuZibandlela edolobheni leHarare lapho okuvunyelwane kungelampikiswano ukuthi amaqembu amabili azakhitshwa kuligi yePremier Soccer League.
Ngokunjalo, amaqembu amane azaphakanyiswa kuzigaba eziphansi angene kuPSL ka2017.
“Umhlangano lo uvumelane lokutshintshwa kwesiqephu sika-21 sesisekelo sombuso esichaza ngenani labantu okumele bahlale kumihlangano yethu. Inani lamalunga lizayengezwa kusuka ku-62 kusiya ku-64,” kutsho umbiko weZifa.
