uMthunywa
Siyakhumbula bafundi ukuthi sathi kulezinsuku sichasisa lezi zaga ezijayelekileyo esithi nxa sizibona sithi zilula kodwa nxa sesihlangana lazo emhlolisweni sezisiphica. Ngalokho asizifundeni lazo njengalezi ezingajayelekile.
Lamhlanje siqala ngesithi: Amajodo awela abangelambiza. Kwandile ukuthi umuntu olethuba lenhlanhla angalisebenzisi kanti lelothuba liyedlula. Kuyenzeka njalo ukuthi, kuze kuthi lalabo abafisa ukulisebenzisa lelothuba lakhe abanqabele. Izinto ezinhle zizuzwa ngabangelandaba lazo. Amandla esambane. Kuyake kutshiyane amandla lengqondo. Kukhona abantu abalamandla okusebenza kakhulu kodwa bengabuyelwa lutho ngenxa yokungasebenzisi ingqondo.
Amankonyane akhethwa kubonina. Kutshiwo ngezikhathi zokuqomisa. Uganga luyafika ekhaya lanxa abazali bekhona, kalulindeli ukuthi luze luthole ithuba lapho intombazana iyodwa njengalokhu esikubona lamuhla. Amankonyane akhethwa kusakhanya. Nxa ufuna ukwenza ulutho wohle ulwenze isikhathi sisekhona funa lelothuba ledlule. Amanzi achithekileyo kawabuthwa/lidume ledlule. Kakusizi ukuchitha isikhathi ukhalela into esivele yonakala, kungcono ukuthi ucabange ngokutsha ukhohlwe ngalokho.
Amanzi amahle kawanathwa/ Isitsha esihle kasidleli/ Elochago ayidephi. Ulutho oliligugu kaluhlali ngoba uya uthi usakholisa ngalo lwedlule.
Amanzi kawayideli indlela yawo. Okhule lomkhutshana wakhe uyaze afe lawo ngoba usuze waba yinto egazini. Amanzi kawadinwa yikugeleza. Isenzo esiyimvelo kulukhuni ukuthi siqedwe yisimiso somuntu. Kuyafanana lomuntu olawulayo, bangaze bazonde bathi kaniki abanye ithuba, kodwa yena lokhu kakutshayi mkhuba.
Amaphikankani afela enkanini. Kuke kwenzeke ukuthi umuntu aphike inkani ngokuxwayiswa okuthile, kuthi inkani yakhe isiphelile bamhleke labo akade ebaphikisa, mhlawumbe ngoba esehlelwe yilishwa kumbe yingozi.
Amaqili angelale ndlunye/Amaqili kawakhelani/amaqili kawathengani abanye bethi amaqili kawagelani.
Abantu abalobuqili balokunanzelela okuthile ngobuqili babo, ngakho baphanga babonane okwenza ukuthi bangathandi ukuhlala ndawonye ngoba elinye lilakho ukwenza uzulu ananzelele ukuthi kuleqili phakathi kwabo.
Amehlo kawancitshwa. Kulukhuni ukuthi ilihlo ulisuse kulokho elifuna ukukubona ngoba wawuthi lanxa utshelwa, loba usazi ukuthi kakufanele ukhangele ulutho, ilihlo libe selikubonile kudala. Lokho kwenziwa yikuthi liyabe lifuna ukubikela ingqondo, ukuze icabange ngakho.
Amehlo madala. Kuyabe kungumuntu omdala etshela abatsha kumbe ebaxwayisa ngeziga ayezibona ebutsheni bakhe ngoba esebona izenzo zalamuhla ezingasafanani lalezo ayezibona ngesikhathi sakhe.
Thapha ulwazi lapha ulusebenzise lapho olufanele khona.
