uMthunywa
Innocent Kurira
UMGCINISIHLALO weqembu lenguqu eleHighlanders uJohnfat Sibanda ubike ukuba balethemba lokuthi inkampani yeSakunda Holdings izavuselela usekelo lwayo eqenjini.
Lokhu kuza ngemva kokuphela kwesivumelwano sosekelo lwemali yinkampani le, mhlaka 31 Mpalakazi 2023.
Ekhuluma lamalunga eBosso ku-Annual General Meeting (AGM) ngeSonto edluleyo, uSibanda uthe baphakathi kokukhulumisana leSakunda. Isivumelwano esedluleyo besingeseminyaka emithathu njalo sibiza ama-miliyoni amadola leMelika.
IBosso iyakhuleka ukuthi iSakunda iphinde njalo ize losekelo lwayo kulisizini.
“Sibonga iSakunda Holdings ngokusekela iqembu ikakhulukazi ngeholo, ukusayina ngemali abadlali, kunye lemisebenzi yokuphatha inhlelo zethu. Ngaphandle kosekelo lwayo lwemali, iminyaka le ibizakuba nzima eqenjini. Usekelo lolu lusilethele usizo olubaluleke kakhulu njengoba iqembu selizenelisa ukuncintisana lamanye amaqembu alemali enengi kuligi,” kutsho uSibanda.
Uthe ukukhulumisana leSakunda Holdings kusezingeni eliphezulu.
“Isivumelwano sosekelo lweSakunda Holdings esaqala ngenyanga kaMpandula ngo2021 siphele mhlaka 31 kuZibandlela 2023. Kodwa-ke iqembu liqhubeka ngokuxoxisana leSakunda Holdings mayelana ngokuvuselela usekelo.
“Sekukhona ukuzibophezela kweSakunda Holdings, kukhona inkomba ezinhle zokuthi iSakunda Holdings isazoqhubeka isekela iqembu,” kutsho uSibanda.
Amaqembu asayina isivumelwano se-$5million eminyakeni emithathu edluleyo lapho inkampani yeSakunda Holdings eyaxhasa khona ngemali abadlali baleliqembu ngeholo, izisebenzi, lemali yokusayina abadlali abatsha.
