uMthunywa
YiNtatheli kaMthunywa
UKUSUNGULWA kweligi yenguqu kaDivision 3 emaphandleni sekukhweze idlabuzane kubalandeli balumdlalo lamaqembu abo, kutsho inhlanganiso yeZifa.
Sekuyiminyaka emithathu iligi ephansi le inxusa amaqembu ukuthi aphatheke kuyo loba nje kulamathimu amalutshwane akhanya ezimisele ukugcwalisisa imidlalo.
Iphephandaba likazulu livakatshele eLupane lapho okuvele ukuthi sekubunjwa amaqembu amatsha alabadlali abasacathula ngenjongo yokuthi amaqembu la afinyelele iligi kaDivision 3 ukuze enelise ukuthi aphakame ayedlala kumaligi alesisindo.
Ngokutsho kukaDennis Tshuma umgcinisihlalo weZimbabwe Football Association esabelweni seMatabeleland North, sekubonakala ukuthi kulethalenta elizwayo kulindawo.
Inguqu yakulindawo ingaphansi kwenhlelo zeZifa njalo ilamaqembu asemthethweni ayisikhombisa kuphela.
Imidlalo isiqalisile njalo kukhangelelwe ukuthi amathimu abemanengi ngokuqala kwesizini yomnyaka ozayo.
Amathimu adlala ku-division le abalisela iLupane FC, Silo, elamapholisa iUnited Forces, Bangale elidlalelwa yizakhamizi zaseJotsholo, elePower Eagles lona eliphuma esigabeni seKomba kanye lele Gwayi Tigers.
UTshuma ubikele iphephandaba likazulu ukuthi ukusungulwa kweligi kaDivision 3 eLupane kuza lamathuba amahle ngoba abadlali bezigaba ezehlukeneyo sebezaziwa labo kulumdlalo.
“Sikhangelele ukuthi sokuzakuba lomncintiswano omkhulu ikakhulu ezabelweni njengoba sokusungulwe iligi kaDivision 3 eLupane. Sesike saqhuba imihlangano lenkokheli ezikhangelane lemidlalo njalo sesilungisisile konke okumele kwenziwe yikho nje sebeligiqa kakhulu,” kutsho uTshuma.
Kumasizini adluleyo inguqu yeLupane lezinye indawo eziseduzane ibiphelela kuligi kaDivision 2. Iligi le yacina ifadalala ngenxa yokungahambi kuhle kwezinto.
Umgcinisikhwama kuligi le uBenjamini Nkomazana uthe abadlali yibo abazincengelayo ukuthi kube loDivision 3 esabelweni sakibo ukuze labo bakhule kwezemidlalo.
“Amaqembu aseqalisile ukuphatheka sibili njalo sikhangelele ukuncintisa lamanye adlala kwamanye ama-division,” kutsho uNkomazana.
