uMthunywa
Nkosilathi Sibanda
KUZABANGWA igolide edolobheni leHwange kumncintiswano yemidlalo yabasakhulayo emitsha eyama-Youth Games.
Imidlalo le ivulwa ngokusemthethweni ngeviki ezayo kulandela ukuhanjiswa phambili kwelanga lokuqala kwemidlalo le.
Imidlalo le encintiselwa yizabelo zonke zelizwe, izaqala ngeSonto njalo kukhangelelwe ukuthi abadlali labagijimi abedlula i-15 000 bancintisele igolide kulumthimba.
Ithalenta lonke elikhona kwezemidlalo elizweni lizakuthi gwaqa edolobheni lamalahle kudingwa intshantshu ezilakho ukubumba iqembu leZimbabwe elizancintisa kuminyaka elandelayo.
Abaqeqetshi, osomabhizimusi labacuphi bamathalenta asakhulayo bagcwalisa inkundla labo bedinga abadlali abangancediswa ukuthi bazibonakalise.
Ngokudingisisa kwephaphandaba likazulu, iqula elibona ngokuqhutshwa kwemidlalo le libambene logatsha lwezemidlalo kuHulumende lavuma ukuthi imidlalo idonselwe phambili. Kuzwakale ukuba zikhona izabelo ezingakalungiseleli okupheleleyo ukuphatheka kumincintiswano le.
“Imidlalo yethu izaqalisa ngeSonto mhlaka 19 kulinyanga. Amalungiselelo aqhuba kakuhle sibili loba kukhona okuncinyane okusamele kuqondisiswe. Umphakathi weMatabeleland North ulindele ukwamukela izethekeli zethu,” kutsho uBurzil Dube umaqhuzu wequla le-Local Organising Committee yemidlalo yalonyaka.
Kumaviki amabili adluleyo imidlalo le isungulwe phambili kwabantu enkundleni yeEdmund Davies eHwange.
Ngaphandle kwedolobho leHwange, ezinye indawo ezizaphatha imidlalo zibalisa isikolo seFatima High esizabamba umdlalo we-table tennis kanye lokugcina izivakatshi. Isikolo seMarist Brothers eDete sizaqhuba imidlalo ye-handball.
Eminye imidlalo izaqhutshwa koBulawayo, ikakhulu ukubhukutsha. Kwatholakala ukuba amachibi eHwange awalungelanga ukuphatha umncintiswano. Kwandise ukuba idolobho elilodwa liqhube yonke imidlalo.
Imidlalo yalonyaka yehlukene laleyo eyancintiselwa kuminyaka edluleyo. Inguquko ekhona ibalisa imidlalo emitsha lokusetshenziswa kwenkundla kuzigaba ezitshiyeneyo.
Lonyaka kulemidlalo engamatshumi amabili lambili ezadlalwa. Kumidlalo le kuzancintisa njalo amakolitshi lamanyuvesithi.
