uMthunywa
Gerald Sibanda
KUSUKELA kubadlali bakudala abafana lo-Ephraim Chawanda kuze kube yintsha yalamuhla, iMpopoma High School iqhubeka ngokubumba ithalenta lebhola eliphambili koBulawayo.
Umdlali weDynamos uJunior Makunike ngomunye wabafunda kulesi isikolo. UMakunike ubeyingxenye yeqembu leDynamos elithwale inkezo yeChibuku Super ngeSonto edluleyo.
Uleminyaka engu-19 yokuzalwa.
Omunye umdlali owalolongwa eMpopoma High ngu-Arthur Chinda odlalela iqembu leChicken Inn.
Lo ngumdlali owenza kuhle ekuqaleni kwesizini esanda kwedlula kodwa, usuke wahlaliswa phansi yikulimala.
UCalvin Chigonero oweHighlanders ngomunye owaphuma eMpopoma.
Esafunda, uChigonero, owaziwa ngelithi “Kung Fu Panda” wayekuqembu elanqoba kumqhudelwano wezikolo oweProton Surrey Under-20 esabelweni sakoBulawayo.
IMpopoma High yaphelela kusigaba sama-quarter final, kumidlalo eyaqhutshelwa eMarondera.
Kuleliqembu kwakuloMalvern Hativagoni osetshibilika kuBulawayo Chiefs. Umdlali lo uke wadlalela iqembu lesizwe elama-Under 17 lama-Under 20.
Kubonozinti, isikolo seMpopoma High salolonga njalo loMatripples Muleya.
Kunguqu yeligi ephakemeyo, eyePSL, umdlali lo wadlalela iBulawayo Chiefs, andubana atshiye ayekuTriangle.
Ungomunye owadlula kuqembu lesizwe elama-Under 20.
Omunye unozinti nguReward Muza.
Angeke ubaqede abadlali abaphuma eMpopoma High, kodwa isibongo esikhulu siyakumqondisi wezemidlalo kulesi isikolo uJames Rugwevera.
