uMthunywa
Nkosilathi Sibanda
NGESIKHATHI iqembu lesizwe lomdlalo wokuqaga licabanga ukuthi selikhohlakele, inkampani ye-TelOne isihambe phambili ngokuletha usekelo anduba leliqembu liyencintisa edolobheni le-London kunkezo ye-World Cup.
Inkampani le inikeze inhlanganiso yeZimbabwe Netball Association (Zina) i$40 000 ebike ukuba ilethemba lokuthi izayengezelela isikhwama seqembu kuhambo lokuya ncintisa.
UMthunywa ukhulume lomaqhuzu weTeOne uChipo Mutasa othe bakubone kufanele ukusiza iqembu lesizwe ngoba lenze kuhle ukuthi lifake iZimbabwe kusibanga saphezulu kumdlalo wokuqaga.
“Sikhethe ukuthi siphathise amantombazana akithi adlala i-netball ngoba ayancintisa lezizwe ezihlonitshwayo kulumdlalo. Imali le le silethemba lokuthi izasetshenziswa ukuthi iqembu lilungiselele,” kutsho uMutasa.
Loba sekuphume imali lakwezinye indawo, kukhanya iqembu lesizwe lifuna imali enengi sibili nanko lokhe likhankasela usizo futhi.
Kuliviki inhlanganiso yeZimbabwe Netball Association (Zina) ikhiphe umbiko kumakhalekhukhwini icela ukuthi iphathiswe laloba yimali enganani.
Kulumbiko, inhlanganiso le ithe: “Ncedani iqembu leZimbabwe Netball kumalungiselelo alo enkezo yeWorld Cup 2019. Sicela lithumele elilakho ku-EcoCash Biller Code 34312,” kutsho lumbiko ogcwale kubomakhalekhukwini.
Umdlalo wokuqaga kuleli ubungela ngitsho usekelo, lamaqembu adlala kuligi ephakemeyo adonsa nzima ngenxa yalokhu.
Kunyanga ezimbili ezidluleyo uMphathintambo wezemidlalo uKirsty Coventry wathembisa ukuba uhulumende uzaphathisa.
UCoventry wathi njengomuntu wesifazane, uzizwa eyingxenye yamantombazana esizwe, wagcizelela ukuba ukuncintisa kuWorld Cup kuphakamise ezemidlalo elizweni.
“Ugatsha lwami luzimisele ukusekela iqembu leZimbabwe Netball. Kunyanga ezedluleyo ngatsho ukuba silinde ukuba inhlanganiso ebambe lumdlalo isinikeze uluhlu lwemali ezafunwa yileliqembu,” kutsho uCoventry.
Iqembu lesizwe lizancintisa kunkezo yomhlaba le edolobheni le-Liverpool ezweni leNgilandi ngoNtulikazi kusukela mhlaka 12 kusiyafika mhlaka 21 enkundleni ye-Echo Arena.
