uMthunywa
YiNtatheli kaMthunywa
LONYAKA kungaba yisizini yokuthi iqembu leTalen Vision lingene kuligi ephakemeyo eyePSL, ngokutsho komqeqetshi wayo uMkhuphali “Mr Cooper” Masuku.
Ngomnyaka odluleyo leliqembu kwakukhangelelwe ukuthi leqe umzila lingene kuligi ezwayo kodwa lakhutha ugatsha kancane.
Kumasizini amabili adluleyo iTalen Vision yilo iqembu elithola udumo ngethalenta elalo nanko phela abadlali bayo babehlohla ukwedlula abamaqembu amakhulu kuleli.
Ngeviki edluleyo iTalen Vision idlale kwaba ngutshiki lobhanqa 1-1 leMoto Moto edolobheni leHwange.
Lo ngumdlalo obekukhangelelwe ukuthi liwunqobe ukuze libuyele phezulu kwelogu.
ITalen Vision leBulawayo Chiefs yizo ezikhangelelwe ukuthi zincintisane ukubusa kuligi le. Zombili zaphetha ziku 0-0 mhla zidlale zonke kumaviki amabili adluleyo.
Amaqembu la alomlandu wokuphakamisa isisindo somncintiswano okhona kunguqu ka-Division One, okuyikho okugcwele khona ithalenta elingaziwayo.
Ngemva komdlalo wabo lo leMoto Moto, umqeqetshi weTalen Vision uMasuku uthe balolongela yonke imidlalo njalo badlalela ukunqoba bebheke phambili.
“Sibheke phambili, asiyi emuva ngitsho lakancane.”
Okwamanje iTalen Vision ihlezi kunombolo yesithathu kulogu ilemiklomelo elitshumi lane.
Itshiywe ngowodwa ngamaqembu aphezulu iBulawayo City esesiqongweni leCIWU ekunombolo yesibili.
IBulawayo City ikhokhela ngoba seyahlohla amabhola angamatshumi amabili kumidlalo eyisikhombisa.
