uMthunywa
Singakadluleli phambili ngesifundo sethu salamhlanje sizaqhubeka sikhuluma ngendlela ijaha elalikhombisa ngayo izolo. Udaba lwethu seluthathela lapha esiphethe khona kuviki edluleyo. Kwakuthi nxa ijaha lelo lilesibongo esingemukelekiyo lapha ekhaya lalihle lilandulelwe ngabadala. Babelikhomba imizi yohlobo lwayo.
Kwakuthi ijaha elilayelwe engxenye kodwa intombi liyithanda, lalihamba kodwa libuye libuye njalo ngezinye insuku. Lokhu kubizwa ngokuthi yikubuya amanyova.
Nxa selibuya amanyova ijaha lelo laliqaphela mhla abadala bengekho ikakhulu nxa babeye etshwaleni. Mhlalokho kuthiwa babefikela kugogo wentombi. Laye ugogo kuthiwa wayelibuza alingise abazali bentombi.
Kwakuthi ngoba lingesilo elivunyelwa kulelo khaya ugogo alilandulele. Nxa zimi kanjalo izindaba, ijaha laliqala ngokukhombisa ugogo wentombi, wawusizwa lithi: “Mina ngikubonile ngahle ngakukholwa, akukho lapha ongilayela khona.” Lalitshukana laye ugogo aze athande ukwazi ngembali yokuzalwa kwalo.
Ngalokhu wayabe efuna ukwazi ukuba ekuzalweni kwalo kakho yini olusendo lwalapha ekhaya.
Lokho kwakuyindlela kagogo yokudinga isiviko sakhe nxa esecalwa ngalo ijaha. Nxa emulini yalelojaha kutholakale mhlawumbe kuboninakhulu ongumhlobo owamukelekayo kulelokhaya ugogo wayelikhulula ijaha ukuba litshengise inkomane zalo.
Kwakuthi kungahlala kungabi lamuntu ekuzalweni kwalelojaha olesibongo esingenza lamukeleke lapha ekhaya ugogo wayehle alilandulele avaleke amasango okungena kulelo khaya.
Ijaha lelo lalizuza ukukhombisa intombi lezo emfuleni ngoba indlela zokungena ekhaya sezivalekile. Indlela eyodwa elingangena ngayo kulelo khaya kwakuyikungena ekhaya limdibi munye lamajaha alemvumo. Lalingena licatsha ngawo lawo majaha.
Lanxa kunjalo intombi zazilithwalisa nzima ngokungalamukeli. Abadala kuthiwa babezidla nxa bebona ijaha selihlala lidlalela ekhaya.
Nxa lizalwa emzini owaziwayo ulungile, ingxoxo lapho ekhaya yayiseyama kakhulu ebazalini balo kubatshazwa ubuntu babo. Injayelo yikuthi kwakuhle kuye ngazifudlana.
Ngakolunye uhlangothi, nxa ijaha lelo lalizalwa emzini okhulunyelwa kubi kumbe lizalwa emhlotsheni ababengaphathelani lawo, umninimuzi waye ebhula phansi ngebhetshu etsho lokutsho ukuba wayengamfuni umfokabani emzini wakhe.
Nxa sekwale umzali kakungabikhona ukwedlulela phambili lanxa intombi yayilithanda ijaha kwakuphutha konke. Sizwile ngamafitshane ngokukhombisa kwezolo, endulo phela. Nxa kungabekwa kanje kuntsha yalamuhla ingamangala ngoba okwakhathesi sekungamandlwane ngelihlo lakudala.
Ayisikho yini okudala ukuchitheka kwemizi indlela abantu abathathana ngayo? Fundani lokhu bafundi likuqathanise lokwakudala. Xoxisanani ngakho litsho ukuthi yikuphi okungcono kulokunye.
