uMthunywa
Ugwalo ludindwe yicollege press publishers
Lamhlanje sizabuyela emuva kancane sikhangele izinto ezithile ebezitshengisa impilo yeNdebele. Leyo mkhuba ibitshengisa impilo yeNdebele kodwa lamhlanje akusenjalo. Izinto seziguqukile ukuthi leyompilo ibengcono kumbe hatshi. Isilivelakancane eminye imikhuba eyayilandelwa endulo. Ezinye izinto ebezisenziwa lamuhla zikhangelwa njengemihlola kumbe into yokuhlekwa iphelele khonalapho. Akusela siNtu esilandelwayo.
Empilweni yakudala amajaha lezintombi babexwayiswa ngabazali, omalume labo yisekazi nxa sekufika kudaba lokuthatha lokuthathwa. Kwakusithi emkulwini ingxoxo yabomama izikiswe empilweni yemizi yabantu abalobuntu. Kuxoxwa ngobuntu bamajaha akhona labazali bawo.Imbuzi yayigudliswa iguma kutshiwo lokutsho ukuthi ozakwendela kuleyo mizi wayeyabe ende ukwenda.
Kwakulamadale phela lapho okwakutholakala khona isilisa kuphela, yikho wawuthola ingxoxo yesilisa kunconywa imizi ethile njalo kuchothozwa engathandwayo.
Kwakuhle kubemgceke ukuthi abazali bathanda lapha hatshi laphaya. Lokhu kwakusenziwa ngabomo kusenzelwa ukuba amajaha agweme imizi elumelayo. Khangela-ke ukukhombisa kwamajaha akudala lokwakhathesi.
Ungalandela okwakusenziwa kudala nxa ijaha likhombisa intombi ungaba yinhlekisa lamhlanje. Kuyamangalisa abanengi lamhlanje indlela okwakuqonyiswa ngayo kudala. Kudala ijaha lalisuka liyekhombisa intombi enconywe ngazali balo.
Lalinqumela emfuleni lapho intombi zazisikha khona amanzi. Lalithi lingayibona eliyikholwayo laliyilanda liyibuze igama layo lokuba lizalwa ngaphi.
Nxa ligcwaliseka laliqhubekela phambili ngokuzibika. Phela ukugcwaliseka kwejaha kunanza lokuthi intombi ingumhlobo bani. Kuyimvelo yabantu yokuthi babandlululane ngemihlobo nxa sekusiza ekuthathaneni.
Laliyiqhuba intombi ijaha lize liyengena layo ekhaya. Ngezinye izibanga njalo likhethe ukuyibeka isikhupha, limise ilanga elokuyethekelela ekhaya ilanga libalele. Nxa lingena ekhaya lalifika likhuleke njengesihambi.
Babethi bengalivumela lalihlala phansi lizithobe. Abazali bentombi babesondela balibingelele besebelibuza lapho okwehliwa khona lokuthi lingumfokabani kuleyo ndawo.
Lalizichaza ngokugcweleyo lisipha impendulo yalokho okubuziweyo. Babeqhubeka abadala bebuza ijaha ukuthi lalibhekise ngaphi. Impendulo eyayijwayele ukuphuma kulelojaha ngeyayisithi liyazulazula lidinga osowabo.
Ngalelo abadala kuthiwa babehle bazi ukuthi luganga lolo. Uganga lijaha elikhombisayo. Ngenjayelo kuthiwa wayethulisa umuntu omdala ezibuza ngenhliziyo ukuba lalifanele yini ijaha lelo ngomhlobo walo.
Nxa lalifanele lalibizelwa umntanyana ukuzo lithatha ahambe lalo exhibeni lezintombi. Khonangale exhibeni lalifika lihlaliswe ecansini. Ngalelothuba lalitshukana layo intombi.
Intombi layo njengabazali bayo yayiqinela ukwazi ngokuzalwa kwalo ijaha. Yayibuza ize ibuze sibi sobunina labo ninakhulu bejaha ngenhloso yokuba isuthiseke ngalelo jaha. Sizama lapha, kusibanga esizayo sitshengisa indlela ezitshiyeneyo zokukhombisa.
