uMthunywa
SINGAKAHLELI isikhanyiso sizaqala ngokuphetha ukutshengisa indlela zokusetshenziswa kobumnini.
Sitshengisile indlela ezinengi ngeviki ephelileyo kwasala indlela ezimbili nje kuphela lezi: 7.
Ubumnini bungasetshenziswa ekukhombeni ukulandelana kwezinto kanje: Umkakhe wokuqala wabalabantwana ababili kuphela. Le yiviki yokuqala izikolo zivuliwe.
Ubumnini kumitsho yomibili yilobu: wokuqala lo yokuqala.
8. Ubumnini bungasetshenziswa nxa kufanekiswa: Bathi lo yinyoka yomuntu ngoba elivila. Yomuntu yibumnini kumutsho lo. Bathi ubehamba lomgqala wentombi ngoba ibinde leyontombi. Wentombi yibumnini kulomutsho.
Siyini isikhanyiso? Isikhanyiso ligama elisitshela ngcono ngesenzo esithile. Isikhanyiso silengxenye ezimbili ohlelweni lwesiNdebele. Ingxenye lezi yisandiso lesenzukuthi.
Khumbula mfundi ukuthi isandiso sisihlele kunsuku ezadlulayo. Lamhlanje sihlela isenzukuthi.
Isenzukuthi ngomunye umhlobo wesikhanyiso. Isenzukuthi, njengazo zonke izikhanyiso, siyandisa lokho okutshiwo yisenzo njalo sandise ukusetshenziswa silandela igama elithi ukuthi.
Isibonelo: Usukume wathi lothu esizwa ibhasi iduma. Igama elithi lothu kulo umutsho yisenzukuthi. Njengoba ubona mfundi, leligama lisitshela ngcono ngokuma komfana.
Nanzi ezinye izibonelo: Intambo abeyelukile iqamuke yathi juqu. Ukudla obekuphekelwe abantu bemzini kuphele kwathi du. Zinengi izindlela zokwehlukanisa izenzukuthi. Ezinye zazo yilezi:
1. Eziphathelane lokuwa: genqu, khithi, wolokohlo, wohlo, dinsi, takla. Umphamisele phezulu wamwisela phansi wathi takla.
2. Eziphathelane lomlilo; bhe, langu, citshi, qhamu. Bathi belibele wathi qhamu umlilo emasimini. Sizaqhubeka ngalokhu kuviki ezayo.
