uMthunywa
Kumnyama kuthe khaca phandle, uSolongo Mpilo uzihlalele esigcabheni endlini yokuphekela koSnini, wozela okomdlezane oqeda kudla. Le yindoda abayanga besigabeni abaxoxisana ngayo ngobuyanga bayo. Ugqoka ezokugugiselwa, adle okokutshiyelwa, embathe obhayi abelifa, ungumhambume kakwaziwa la ahlala khona. USnini ngesihawu alaso usehlale laye uMpilo okwenyanga ezimbili emupha ukudla lesepa yokuwatsha amadabudabu akhe. UMpilo laye usevukela okuyimsebenzenyana kwangekhaya kanye lokwelusa imbuzi lanxa zingangaki. Likhona izinyane aselithenjisiwe ukuthi kunyanga ezayo uzaliphiwa nxa engaqhubeka ephatha umsebenzi ngendlela. Lowo mcabango wokuba lento ebiza yena wenza ake azincwebe.
Nxa kulento oyiqapheleyo insuku zinde lobuthongo abuqutheki, wenza sengathi ngumuntu ofuthelwayo, olesilonda ekhaleni. Zinjalo insuku kuMnunzana Mpilo, umsebenzi awuphiwayo lanxa unganani, awutsho lutho nxa sekuqathaniswa lomvuzo oza masinyane nje. Lanxa engahaladwa kungela sizatho ukutshaya indiva lokhu ngoba imbadalo yakhe akusi mali engathengi lutho kulezi nsuku, lizinyane. USnini laye wenziwa yikuthi kalani okunye angakupha usowabo ngaphandle kwalo lelo zinyane. Phela lapha ekhaya wonke umuntu udla kanye ngosuku njengenja, yimpilo yokuqogelela, umangoye seyake alale eziko. Lanxa kunjalo kwakumdlela umzimba uSnini ukubona “ubhudi uSolo” esidla luklubhu, wakubona kungcono ukuthi baqamulelane ingqondo lenthethe kulokuthi ayeke omunye wakhe egida emalahleni.
Kakho ngaphansi kwelanga ozuza konke akudingayo empilweni. Abanye kusobala njengamadolo embuzi ukuthi ngabayanga bokucina “ohway’ ibhetshu.” Abanye njalo ngabayanga ngendlela ezifihlakeleyo kuzulu. Baswela ulwazi thile, imfundo thile, impilakahle, ukusuthiseka emoyeni, ukuthula, ukukhalipha, njalonjalo. Ukweswela kwakho kungabanga ukuthi kube lento oyesabayo, kuSolongo Mpilo labanye abanjengaye, okwesabeka kakhulu yikufa ngendlala, kuwe kungaba ngumkhuhlane kumbe ukudilikelwa yibhizimusi; kunengi kungebaliseke okwesatshwa ngabantu. Ungafika kuleso sigaba osesabayo, uvalo luthi va, umoya kube ngathi uvinjiwe emphinjeni, lomzimba uqale ukutshisa uze wehle izithukuthuku lanxa kuqanda.
Okwenzayo kusimo esinjalo kuqakathekile, ungenzi njengezinyane likaSolo. Isedlule inyanga yesithathu, sokuyinyanga yesine, uSolo laye usele zinyane elibiza yena, lahle laphiwa ibizo; Hetshwa. Lusuku lapho kusibathele, liyaduma, lithwele amayezi amnyama. Kabonakalanga uHetshwa, uphaphatheke wangena igusu ngokwesaba, manje selitshonile, sokulomnyama obambekayo. Qaphela ungenzi sinqumo usesimeni sokwethuka funa ungalitholi ithuba lokulungisisa okuphanjanyiswe yileso sinqumo. Ukwesaba, kuzala ukuthithibala, lokwethuka, imbuzi kaSolo isesimeni esinjalo yaqala ukunanzelela ukuthi ilahlekile; yaqala ukukhala ingazi lokuthi iqonde ngaphi, ikanti ikhala isiya emakhankeni!!!
Thintana lo Trevor Mhlanga kunombolo zikamakhal’ ekhukhwini ezithi: +263 775 523 605
Kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
