uMthunywa
YiNtatheli kaMthunywa
IKOLITSHI lomdlalo wenguqu esabelweni seMatabeleland North iPonel Youth Academy ibika ngokujabula ukuba kusukela ngomnyaka ozayo izabhadalela abantwana abalitshumi lambili indleko zemfundo esikolo.
Lokhu kuza ngemva kokuzimisela kwenkokheli zaleliqembu ukuthi abadlali babo baphakanyiswe kunguqu lakumfundo yesikolo. IPonel Youth Soccer Academy ngeyabafana abasakhulayo abalolongwa ngabaqeqetshi kuzwa kumdlalo kanobhutshuzwayo eDete, esabelweni seMatabeleland North.
Ekhuluma lephephandaba likazulu ngoLwesibili emini, umqondisi wePonel Youth Soccer Academy uNelson Ndeka ulandise ngohambo lwabo lokhe basungula ikolitshi labo, wathi ukunikeza usizo lwe-school fees kubadlali kuyingxenye yenhlelo zabo zokuthuthukisa abadlali.
“Sicabange ukuthi sinikeze usizo olukhulu kubadlali benguqu abathile abadabuka ezikolo lakuziqinti eziseHwange laseDete. Saqoqa umncintiswano owadibanisa amaqembu amathathu, okuyilapho esathola khona abadlali abalitshumi lambili esizababhadalela i-school fees,” kutsho uNdeka.
Uthe ukubhadalela abadlali babo esikolo kungenye yenhlelo zabo zokuthi bakhiphe intsha ezitaladeni.
“Sananzelela ukuba inengi labadlali abalethalenta esigabeni seHwange batshonela ukuhlala ezitaladeni lasemavinkilini.
Ukuze senqabele ukutshabalala kwamaphupho abo, sikhethe ukuthi sibagcine ekolitshini lethu lenguqu lokuthi bachithe isikhathi besesikolo.”
UNdeka uthe ngomnyaka ozayo balinde ukuthi bavule isizini ngomfutho nanko sebegcwala ngobunengi abafana abasakhulayo abakhwabitha ukufunda umdlalo kanobhutshuzwayo.
Ukwanda kwabadlali ababhalisa ukuba yingxenye yaleliqembu kuza ngesikhathi isikolo lesi sivule isitolo sempahla yenguqu ngenjongo yokukhankasa ibizo laso izwe lonke.
Esabelweni seMatabeleland North, iPonel Youth Soccer Academy yinhlanganiso yenguqu yakuqala ukuvula isitolo esithengisa impahla yenguqu edindwe ibizo layo.
UNdeka uthe inengi labazali abahlala endaweni ezitshiyeneyo ezibalisa iDete, iBinga, Hwange le-Folosi sebenikeze iPonel Youth Soccer Academy umlandu wokuthi ifundise abantwababo unobhutshuzwayo.
“I-Academy yethu iyakhula ngokwanda kwabadlali abasakhulayo abeza ukuzokuba yingxenye lathi,” kutsho uNdeka.
“Sivule isitolo sokuthengisa impahla yenguqu edindwe ibizo lethu kunyanga ezedluleyo okwenze sakhanga amehlo omphakathi kundawo ezitshiyeneyo.”
UNdeka uthe imali abayithola esitolo iphathisa kunhlelo zokuvuselelwa kwenkundla lezakhiwo ezizasetshenziswa kwelizayo.
“Umqondo wethu ubanzi njalo uyacaca. Njengoba ukudlalwa kwebhola kusavaliwe kanje, ukuphatheka kubhizimusi lempahla kusikhuthaze ukuthi sidinge imali ezasebenza kunhlelo zethu ezinengi.
“Kusehlelweni lwethu ukuba lenkundla engeyethu, izakhiwo zabadlali, ezomphakathi kanye lokwakha iHigh Performance Centre ezaqinisa ukufundiswa kwenguqu kwabasakhulayo,” kutsho uNdeka okholwa ukuba ithalenta lenguqu eZimbabwe ligcwele kodwa lincitshwa usekelo.
Ukuvulwa kwamakolitshi enguqu sekubonakale kuyiyo indlela yokubumba abadlali bohlonzi. Amaqembu womdlalo umhlaba wonke aseqonda kumakolitshi afana le-Ponel Youth Soccer Academy ukuze athole abadlali abapheleleyo.
“Kwelakusasa, kuminyaka emilutshwane nje, iPonel Youth Soccer Academy izakuba yindawo okuhlangana khona abaqeqetshi belwisa ukudinga abadlali. Umkhulu lumsebenzi njalo sizimisele.”
