uMthunywa
Isichasiso ligama elichaza usobizo (ibizo lesabizwana) emutshweni.
Funda imitsho elandelayo: Isela balitshaye ngelitshe elikhulu kakhulu. Bona bagamule intungo ezinde. UDudu uhambe lodadewabo omdala bafica umfana omfitshane kunguye olinde umuzi. Bebethwele izitsha ezintsha.
Kuyonale imitsho engaphezulu nanzelela ukuthi la amabala: elikhulu, ezinde, omdala, omfitshane, ezintsha, asetshenziswe ukuchaza amabizo lezabizwana. Isichasiso silengxenye ezimbili: isivumelwano lesiqu. Izivumelwano yizakhi esiqalisa ngazo ezichasisweni. Izivumelwano lezi yizo ezidala umehluko phakathi kwezichasiso zemihlobo etshiyeneyo.
Mine imihlobo yezichasiso: (a) Isiphawulo (b) Isibaluli (c) Inani (d) Ubumnini
Kufanele kube lokuvumelana phakathi kwesivumelwano sesiphawulo losobizo ochazwayo. Hlolisisa izichasiso ezikhethwe kumitsho engaphezulu. Izibonelo: ilitshe elikhulu, intungo ezinde, udadewabo omdala, umfana omfitshane, izintsha ezintsha. Izichasiso eziqanjwe lapha yiziphawulo, umhlobo wakuqala wesichasiso.
Funda ngesiphawulo khathesi: Isiphawulo yisichasiso esichaza usobizo esimlandelayo. Laso isiphawulo silengxenye ezimbili, isivumelwano lesiqu. Zilitshumi lanhlanu kuphela kuphela iziqu zesiphawulo. Nanzi: -nye, -bili, -thathu, -ne, -hlanu, -khulu, -ncane, -hle, -bi, -de, -fitshane, -nengi, -ngaka, -dala, -tsha. Yizo lezi kuphela iziqu zesiphawulo kazikho ezinye.
Kuviki ezayo sizakhangela izivumelwano zesiphawulo ngezigaba zamabizo.