uMthunywa
Isibanjalo sokukhomba
IZIBANJALO zokukhomba, njengezabizwana zokukhomba, sizehlukanisa kathathu ekukhombeni kwazo.
Zikhomba eduze, buqamama lakude. Izibonelo: Kusigaba 1 isibanjalo sokukhomba eduze ngu/nangu/.
Isibanjalo esikhomba buqamama ngu/nango/. Isibanjalo sokukhomba kude ngu/nanguya. Lokhu kufana xathu lalokho okwenzakala kusigaba 1a.
Isibanjalo sokukhomba eduze kusigaba 2 ngu/nampa/. Isibanjalo sokukhomba buqamama ngu/nampo/.
Isibanjalo sokukhomba kude ngu/nampaya/. Lokhu kufana lokwenzakala kusigaba 2a. Isibanjalo sokukhomba eduze kusigaba 3 ngu/nanku/. Isibanjalo sokukhomba buqamama ngu/nanko/. Isibanjalo sokukhomba kude ngu/nankuya/.
Isibanjalo sokukhomba eduze kusigaba 4 ngu/nansi/. Isibanjalo sokukhomba buqamama ngu/nanso/.
Isibanjalo sokukhomba kude ngu/nansiya/. Isibanjalo esikhomba eduze kusigaba 5 ngu/nanti/. Isibanjalo esikhomba buqamama ngu/nanto/. Isibanjalo sokukhomba kude ngu/nantiya/. Isibanjalo esikhomba eduze kusigaba 6 ngu/nanka/. Isibanjalo sokukhomba buqamama ngu/nanko/. Isibanjalo sokukhomba kude ngu/nankaya.
Isibanjalo sokukhomba kusigaba 7 sifana lesikasigaba 4. Isibanjalo sokukhomba eduze kusigaba 8 ngu/nanzi/. Isibanjalo sokukhomba buqamama ngu/nanzo/. Isibanjalo sokukhomba kude ngu/nanziya/.
Isibanjalo sokukhomba sikasigaba 8 siyafana lesesigaba 10. Isibanjalo sokukhomba eduze kusigaba 11 ngu/nantu/. Isibanjalo sokukhomba buqamama ngu/nanto/. Isibanjalo sokukhomba kude ngu/nantuya/.
Isibanjalo sokukhomba eduze kusigaba 14 ngu/nampu/. Isibanjalo sokukhomba buqamama ngu/nampo/.
Isibanjalo sikhomba kude ngu/nampuya/.
Nanku esikunanzelela lapha: 1. Kuzo zonke izigaba isibanjalo sokukhomba siqalisa ngo-na-. 2. Izibanjalo zokukhomba buqamama zicina ngo- o. Ezokukhomba kude zona zicina ngo – ya. Bakhona abasebenzisa u-yana lesibanjalo sokukhomba kude kanje: nampayana, nankayana, nanziyana.
