uMthunywa
YiNtatheli kaMthunywa
AMANTOMBAZANA adlala inguqu esikolo seSelonga Secondary eGwanda asezathola ukukhululeka nanko alinde ukunikezwa isipho sempahla yokudlala ibhola kulandela ukudlala kwabo kuhle ngomnyaka odluleyo.
Isikolo lesi sizakhele udumo ngokunqoba zonke kumidlalo eminengi eqhutshelwe esabelweni seMatabeleland South.
Kuminyaka emithathu edluleyo iSelonga ibisiba yintshantshu yemidlalo yeNational Association of Secondary Heads, iCopa Coca-Cola lezinye inkezo.
Abadlali balesi isikolo baphakamise isabelo seMat South ngokuncintisa kumqhudelwano omkhulu ukwedlula zonke kunguqu yezikolo iCopa Coca-Cola. Kumbali yayo yenguqu iSelonga Secondary isitshaye izikolo ezibalisa iMatopo High, iGwanda High, iThekwane leManama.
Kulandela ukuzwa ukuthi isikolo lesi siyatshisa kunguqu, uDavid Moyo ongusomabhizimusi koBulawayo laseGwanda usejonge ukuncedisa iqembu lesikolo lesi ngakho konke elikufunayo.
Kungxoxo abelayo loMthunywa mayelana lenguqu yamantombazana ezikolo ezisemaphandleni, uMoyo uchaze ukuthi inkampani yakhe yeFulgens Enterprises izaphathisa ngokuthengela abantwana beSelonga amabhola, izicathulo lezinye impahla ezifunwa ngamantombazana ezibalisa ama-sanitary pads.
“Umntwana oyinkazana kumele ancediswe ngakho konke akufunayo. Ukugcina kuhle abadlali benguqu yamantombazana yikwakha isizwe. Isizwe sakhiwa ngokugcina abesifazane ngakho ukusekela lokuncedisa inguqu yabo kuqakathekile. Isikolo seSelonga Secondary sesidlale kuhle sibili kumincintiswano yezikolo. Udumo lwalithimu seludonse amehlo abantu esigabeni seGwanda South. Njengoba lami ngivela kulindawo, ngibone kungcono ukuthi ngincedise isikolo lesi.
“Okwakhathesi sisakhulumisana labaphathi besikolo kanye labo abantwana abadlalayo sihlanganise amakhanda sibone ukuthi singancedisa ngani. Okwakuqala esizakwenza yikuthengela iqembu lamantombazana leli impahla ezibalisa amabhola, izicathulo, amambule lokunye.”
UMoyo, ozibiza ngokuthi ungumsekeli omkhulu wenguqu yamantombazana, ubike njalo ukuthi inkampani yakhe yeFulgens Enterprises izanikeza abadlali abathile umsebenzi.
“Ngenxa yokuthi ngisekela inguqu yamantombazana nsukuzonke, ngithanda ukubika ukuthi inkampani yethu ilakho ukuthi ivulele amantombazana la adlala ibhola amathuba okuthi baze ukuzosebenza kuyo.
“Lonyaka ngenze isinqumo sokuthi ngiphathise isikolo seSelonga kanye lezinye indawo ukuze abantwabethu abangamantombazana bekhulise ithalenta labo. Singenelisa ukuncedisa amantombazana alethalenta,” kutsho uMoyo ebikela uMthunywa ngoLwesibili.
Kusenjalo, uMoyo useqalise uhlelo lwakhe lokuncedisa amathimu aphuma eGwanda South adlala umdlalo wokuqaga.
“Umdlalo we-netball ngomunye umdlalo engiwuzwisisa kakhulu. Uyakholisisa umdlalo lo njalo ungomunye wemidlalo engibona angathi ulakho ukuphakamisa omama, ikakhulu amantombazana.”
