uMthunywa
LAMUHLA sizaphinda umphehlo kungxenye zohlelo esizenze ngaphambilini. Nanzelela mfundi ukuthi asikaphutshi ukuhlela ingxenye zonke zohlelo. Ngezibaya zethu esizilandelayo nxa sihlela uhlelo isandiso sona lesi esisanda kusiphutsha sihamba lesenzukuthi ngaphansi kocezu isikhanyiso.
Khumbulani ukuthi sathi isandiso njengesikhanyiso ligama elikhanyisa ngesichasiso, ngesenzo, ngesibanjalo kanye langezinye izikhanyiso mayelana lesikhathi, lendawo kanye lesimo. Funda imitsho elandelayo ubone ukusebenza kwesikhanyiso: Umfana uhambe ekuseni. Ekuseni yisandiso esikhomba isikhathi. Emutshweni lo lisikhanyisela ngesenzo/hamba/ lisitshela ukuthi umfana uhambe ngasikhathi bani.
Ugogo ufikile edolobheni. Edolobheni yisandiso sendawo kulumutsho. Lisikhanyisela ngendawo lapho ugogo afike khona – edolobheni. Umphathisikolo umtshaye kakhulu umfundi oxhwalileyo. U/kakhulu/ kulumutsho yisandiso sesimo. Ukakhulu usikhanyisela ngesenzo /tshaya/ ukuthi umphathisikolo umtshaye okunganani lowo mfundi.
Labo abangabe sebekhohliwe ukuthi sizihlela njani incezu zenkulumo lezi, yekela sibakhumbuze njengoba siphinda umphehlo nje: Silo sobizo ogoqela ibizo lesabizwana. Isichasiso – isiphawulo, isibaluli, inani kunye lobumnini.
Isilandiso – isenzo lesibanjalo. Isikhanyiso esigoqela isandiso lesenzukuthi. Sikhumbule njalo bafundi ukuthi ukufunda uhlelo akupheleli ekwazini ukuthi lokhu kuyini lokunika izibonelo kuphela, kumele sazi okudlula lapho.
Kumele senelise ukukhetha incezu lezi emitshweni njalo sazi lokuzisebenzisa emitshweni okuqondileyo.
Ngalokho-ke usungaba legunya ukuthi uyalwazi uhlelo. Sizaqhubeka siphinda umphehlo ukuze labo abazaloba imihloliso lonyaka balwazi uhlelo benze kuhle emihlolisweni yabo.
