uMthunywa
NANZI impendulo zemibuzo yeviki ephelileyo.
Le yisabizwana sokukhomba eduze. Lezo yisabizwana sokukhomba buqamama. Lesi yisabizwana sokukhomba eduze.
Leziya yisabizwana sokukhomba kude. Lo yisabizwana sokukhomba eduze.
Impendulo ezigcwalisa izikhexe. Ingcebethu le iyavuza. Lezi ziganyulwe izolo. Lesi sithonta uchago ngaphansi. Indlu le izadilika ngoba kayakhekanga kuhle. Ubuhlalu lobu buchithekile. Inkomo leyo ifohlile isibaya.
Lezo zizahlatshwa kusasa. Lezo yisabizwana sokukhomba buqamama. Isihlahla leso siwiswe ngumoya. Isabizwana sokukhomba buqamama. Hamba ubuye lalezo. Lezo yisabizwana sokukhomba buqamama. Umuntu lowo ufike izolo.
Lowo yisabizwana sokukhomba buqamama.
Nanzi izibonelo zokuhlela izabizwana zokukhomba ngezigaba zamabizo.Ziyafanana izabizwana zokukhomba kuzigaba 1, lo 1a kanje: Eduze ngu lo; Buqamama ngulowo, Kude ngulowaya. Kusigaba 2 lo 2a sithola zimi kanje lazo: Eduze ngulaba; Buqamama ngulabo, Kude ngulabaya. Kusigaba 5 isabizwana sokukhomba eduze nguleli; Buqamama ngulelo, Kude nguleliya. Kusigaba 6 Eduze ngula; Buqamama ngulawo; Kude ngulawaya.
Kusigaba 11 isabizwana sokukhomba eduze ngulolu; Buqamama ngulolo; Kude nguloluya. Kusigaba 15 isabizwana sokukhomba eduze ngulokhu; Buqamama ngulokho; Kude ngulokhuya. Qaphela ukuthi esabizwaneni sokukhomba kude singajobelela u –na, njengokuthi lesiyana, loluyana, lobuyana.
