uMthunywa
YiNtatheli kaMthunywa
ABADLALI abagiqa ibhola kuligi ephakemeyo bazathi ukuthola ukuphumula okwamalanga amalutshwane nanko phela iPSL ibika ukuthi imidlalo yayo izamiswa mhlaka 18 kusiyafika umhlaka 30 kulinyanga.
Inhlanganiso yePSL ibikele uMthunywa kuliviki ukuthi ababukeli bomdlalo kumele batshelwe ukuthi kusukela ngoMvulo weviki ezayo inkundla zonke zizavalwa kodwa kuzabukwa umdlalo owodwa phakathi kwekhefu leli owenkezo yeZNA Charities.
Kulinkezo kuzadlala iHighlanders leHarare City eBarbourfields.
“Akulathimu ezavunyelwa ukudlala phakathi kwekhefu leli. Sikhangelele ukuthi umdlalo wehlandla lesibili wesizini uqhutshwe mhlaka 30 kuNtulikazi.
“Umdlalo ozakuba khona ngoweZNA Charity Shield odibanisa iHighlanders FC leHarare City FC. Umdlalo lo uzadlalelwa eBarbourfields njalo yiwo wodwa ovunyelweyo,” kutsho umbiko ophuma kuKudzai Bare isikhulumi sePSL.
Ihofisi yokukhitshwa kwembiko yePSL le ikhuthaze abasekeli bomdlalo ukuthi bahloniphe amathimu labadlali ngalesi isikhathi sekhefu.
“Inhlanganiso yeCastle Premier Soccer League ithanda ukukhuthaza amaqembu ukuthi anikeze abadlali isikhathi sokuphumula. Sikhuthaza njalo labanikazi benkundla ukuthi balungisise inkundla zabo.”
Imidlalo yePSL kulimpelaviki
NgoMgqibelo: Harare City v Chicken Inn (Rufaro), Ngezi Platinum Stars v Triangle United (Baobab), Tsholotsho FC v Hwange (White City).
NgeSonto: Dynamos v ZPC Kariba ( Rufaro), Border Strikers v How Mine (Dulivhadzimu), FC Platinum v Bulawayo City (Mandava), Chapungu v Mutare City Rovers (Ascot Stadium), Highlanders v Caps United (Barbourfields).
