uMthunywa
YiNtatheli kaMthuywa
ABADLALI benguqu kuligi ka-Division One kumhlubulo ongezansi yelizwe sebebikelwe ukuthi bakhuthalele ukuhlohla amabhola amanengi kusizini ezayo ngenxa yokuthi inkampani yeNokel Security isizimisele ukuhlawulela imvuzo yalo ozabhoboza umambule.
Ngokubika kwenkampani yeNokel Security, umgadli ozakhokhela abanye ngobukhali bokuhlohla uzaphiwa umvuzo ophezulu kulalowo obuthenjiswe kusizini ka2016.
Usaziwayo kwezamabhizimusi lakunguqu uKenneth Mhlophe, ophinda abengumaqhuzu weNokel Security ubikele iphephandaba likazulu ukuba uyaqhubeka ngokusela inguqu ka-Division One.
“Ngesizini ezayo thina njengeNokel Security asiyindawo. Sithembisa ukuthi sizaqhubeka sisekela umdlalo wenguqu kusibanga sika-Division One njengalokho esikwenze kumasizini wonke.
“Esikuqakathekisa khathesi yikuthi siphakamise abagadli ukuze bahlohle. Kulisizini ka-2016 besithe umvuzo sizakupha i$300 kumdlali ozahlohla amabhola angu-22.
“Siyaqhubeka sikwenza lokhu kodwa kuzamele sihlale phansi lenkokheli zeZifa kuqala,” kutsho uMhlophe.
Lonyaka umvuzo lo ubuzakuya kumdlali weBlack Boots uTashinga Mungazi kodwa wasuka wehluleka esehlohle angu-15 kuphela.
Inkampani yeNokel Security isileminyaka isekela uDivision One kulumhlubulo njalo yiyo njalo ehlawulela umvuzo we$150 wenyanga zonke womdlali odlala okwedlula bonke.
Ngesizini ka2015, umdlali owedlula bonke kwabangu Ishmael Wadi owahlohla amabhola angu-10, edlalela iBulawayo Chiefs.
UMhlophe uqhubeke wathi: “Abadlali bethu abafunde ukuhlohla. Kulezinsuku sekuhlohlwa amabhola amalutshwane okuyikho okuveza ukuba kumele abadlali bethu bakhuthazwe ngemvuzo. Ngaphandle kwalokhu, abadlali abasebenze gadalala ukukholisisa ababukeli bemidlalo lokuziphakamisa bona.
“Inkampani yeNokel Security ilokukholwa ukuthi kulethalenta elikhulu kubhola likaDivision One kulumhlubulo njalo ithalenta leli kumele lisekelwe.”
UMhlophe ngomunye wabosomabhizimusi abasekele inguqu kaDivision One kusukela kudala njalo ukuphatheka kweNokel Security kumdlalo wenguqu kukhangelelwe ukuthi kuhuge amanye amankampani alandele indlela efanayo.
