uMthunywa
Pathisa Nyathi – Sahamba sabona samangala. Iviki elidluleyo sibesivakatshela imizi yeMatojeni sisahlulela emncintiswaneni wokucomba izindlu, My Beautiful Home. Besingamaqembu amahlanu aphathekileyo kulo umsebenzi. Iqembu lakuqala kube kungelikaPhurofesa uJohn Knight oweNust lona ebeliqonde kuWadi 15 emangweni weGulati.
Iqembu lesibili kubekungelikaViolette Kee-Tui yena oqonde kuWadi 16 eSilozwi. KuWadi 23 kuye uDokotela u-Andre van Rooyen emangweni weMalunde. UClifford Zulu uphume waqonda kuWadi 25 eWoollendale eduzane lakoBulawayo. Iqembu lokucina libelingelami loVeronique Attala. Thina-ke besikhangele amawadi amabili, u 18 lo 24.
Ngizakhuluma-ke ngolwethu uhambo ngoba ngingazi ukuthi amanye amaqembu aqhuba njani. Sahle sayaqala kuWadi 18 ogoqela iBazha, iMazhayimbe leFumugwe. Ngosuku lwesibili saqonda kuWadi 24 ogoqela iJeqe, iSidney Malunga, iMafela leTshatshane. Ngosuku lokuqala sasitshayelwa ngumkaVeronique uMichelle. Saphuma ngomgwaqo oqonda ePlumtree sithe sisanda ukwedlula eRedwood sathi phaqa kwesenxele sathatha umgwaqo othutshela emgwaqweni weKezi lapho oyabe usunguKhumalo West.
Emsebenzini wethu saphelekezelwa nguSunday Ndlovu, uWidy Moyo lomama uKhululekani Dube. Indoda yakoNdlovu sahle sayithola isisimelele eJeqe. Sahamba layo sayadobha abanye sahle saqala umsebenzi. UMoyo nguKhansila ngakho ababesahlulela nguNdlovu loMaDube. Lapha sasidinga ingcitshi ekucombeni imiduli phandle kwayo. Sasidinga futhi ingcitshi ekucombeni ngaphakathi kwendlu. Mina-ke ngangihamba ngifunda imisebenzi yabomama.
Ngananzelela ukuthi omama abanengi baleminwe. Imizi yabo ihlanzekile yasiphinda iconjwa ngobuciko obungunokutsho. Kunengi ke okuconjwayo.
Kukhona abacomba imvelo, lapha sisitsho izihlahla, amadwala, izinyamazana ezigoqela intundla, indlovu, obhejane kunye lamabhalabhala. Lenyathi yayidwetshwe ngabanengi. Ngananzelela futhi abanengi bacomba izimbiza zomdaka, amagabha alamaluba kunye lengcebethu lezitsha abazisebenzisayo.
Kukhona futhi abadweba lokhu esithi ngamashevuroni, amajingojingo phela. La ke yiwo amanengi kakhulu. Iloba nguphi umama wawuthola edwebe amajingojingo. Ngababuza abanenngi ukuthi kambe angabe atshoni kodwa isimanga yikuthi kakho loyedwa owake wafanisa. Abantu bayadweba abangakwaziyo ngitsho uBatayi.
Bakhona ababedwebe izehlakalo phakathi kwezindawo abahlala kuzo. Abanye ngababenatha utshwala kuthi abanye bezingela. Abanye kwakungabagigayo, ababhulayo kunye lababhema igwayi. Amahawu aphethwe ngamaqhawe ayemanengi. Ngikhumbula omunye umama owayedwebe indoda elehawu lomkhonto esibuza ukuthi lowo kwakungubani. Omunye esasilaye waphanga wathi yinkosi uLobhengula.
Mina engiphuma emkhonweni weKezi ngananzelela ukuthi omama balapha ezintabeni babumba indawo lapho okuhlala khona imiganu, amankomitsho, inkonxa, amaqhaga kunye lezindiwo. Kwesokudla kulomdudlana lapho obaba abangahlala khona. Kukhanya emizini le obaba bahlala eceleni langakwesokudla kube kanti omama bahlala kwesenxele.
Kwandile futhi ukubona kwakhiwe amasofa ngomdaka. Kwezinye izindlu amasofa ayefika amathathu. Phezulu kwamasofa abunjiweyo la kwakufakwa amalembu asamqamelo ukuze kuhlaleke lula. Amashelufu akhona ayenziwe abazinhliziyo besekufoliswa izitsha zikamama.
Ngananzelela futhi ukuthi amaziko asaguquka abangawokubukisa hatshi ukubasela umlilo. Ubunengi bala kaseyindilinga kodwa aselamakhona amane. Lokuconjwa amanye asaconjwa okuhle kukhombe inguquko eseyabakhona. Minengi imikulu elokhu isindwa ngobulongwe. Uthola lapha kubalaziwe ngeminwe kamama.
Savuma sibili ukuthi omama balapha bayayithanda imizi yabo nanku phela indlela abacomba ngayo ikhomba lokho.
