uMthunywa
kuloba uPathisa Nyathi
PHO njengoba ngangingaluzwa ulimi lwabo ngatshedela eceleni amehlo ami aqala ukukhangwa yizinto ezazendlelwe phansi. Ngingene lapha endlini elondoloza imvelo ukuthi ngizebona ukuthi kambe laba abantu balokuhambelana yini lathi. Indlu le esiphakathi kwayo kwakuyikolitshi yabafundisi beRoma. Phela amaPhuthukezi eza lapha eBrazil ayekhonze kakhulu okholweni lweRoma.
Izizwe ziyawulondoloza ziwulonde umkhondo wazo walapha emhlabeni. Umahluko yindlela lokhu okwenziwa ngayo.
Lapha endlini le engikuyo kutshengiswe izinto ezazisetshenziswa izolo. Okunye ngokubhaliweyo. Udubo nje yikho lokho ukuthi ulimi yisiPhuthukezi. Ngakhangela ngankema ngoba nginanzelela ukulahlekelwa kwami ngumthombo lo engijame eduzane kwawo.
Lanxa kunjalo zikhona izinto, kangithi izitsha, ebezisetshenziswa ngabanye abantu ezikhona lapha. AmaPhuthukezi athe efika lapha athola bekhona abantu ababehlala kuzwekazi leli. Laba abantu yibo okwakuthiwa ngamaNdiya.
Balenwele ezibutshelezi lebala elingathi ngelabaThwa. Yibo abaqala ukugqilaziswa ngamaPhuthukezi kwathi inengi lahlehlela emuva lacina lisiyazithukuza emaguswini amnyama akhatshana lasogwini. Lalamhla abantu laba banengi eduzane lomfula omkhulu u-Amazon.
Ibalulekile-ke imbali yabo. Okulotshiweyo kangikuzwa kodwa lokhu ababekusebenzisa kuyazikhulumela. Kululimi kimi ngoba kuhambelana lalokho esikwenzayo lathi. Bathi abanye besalandiselwa inganekwane yamaNdiya la mina ngahle ngaqala ukukhulumisana lezitsha zabo. Ngavuma ukuthi abantu sibili badabuka hlanga lunye. Singabe kasazi ukuthi amaNdiya la azafika njani kuleli lokuthi khona lapho kwakunini.
Ngabona bamangala ukuthi yini kanti engikitazayo. Ngabonakala ngimamatheka nje nxa lapho ngikhangela izinto zamaNdiya. Hawu Batayi, sengathi ngezakithi xathu. Ngahle ngakhangwa ngumbala wezinto ababezenza. Ziyafana nje lezakwethu ezenziwe ngelala. Lombala ngowelala ncamantsha! Zibalaziwe izitsha, zibalazwe njengezakithi nta. Labo bayayithanda ishevuroni le etholakala ezitsheni lezimbizeni zakithi.
Aluba bebekhona bekhuluma ulimi engiluzwayo ngangizababuza mayelana lengcazelo yemibalazo le. Umbala wemibalazo ungathi ngeyesihlahla somnyiyi. Kambe ukuthi isihlahla lesi lakhonale sikhona? Engxenye sikhona esihambelana lawo umnyiyi. Pho kangisatholanga ithuba lokuthubeleza lamagusu akhonale ukuze ngizibonele imihlobo yezihlahla ekhona.
Okunye okwangithumba inhliziyo yikuthi izitsha zabo zakhiwe zaba yindingilizi. Kanti angithi nje yikho lathi esikwenzayo. Imiganu yokudlela, kangithi mina abakubazayo labakuthungayo konke kubunjwe kwabayindingilizi. Usuka uzibuze ukuthi kambe kasidabuki ndawonye lalaba abantu na? Pho bafika njani, baze bafane lathi ezintweni ezinengi kangaka?
Ngaphinda ngabona iseluko abasisebenzisa ekugoleni inhlanzi. Iseluko lesi selukwe ngendlela evumela inhlanzi ukuthi ingene phakathi kodwa nxa isithi iyaphuma kusuka kuyehlule lokhu. Hawu wena osuke wabona indlela amaTonga agola ngayo inhlanzi ungazwisisa engikhuluma ngakho. Yiyo xathu!
Okunye engakunanzelelayo yikuthi lababantu bayabaza umganu loba esinye isiphathelo sifane lenyamazana thize. Lathi lokhu silakho. Lukhona udiwo olufuze inqama olwatholakala emanxiweni eKhami. Kanti khona eGibithe angithi kukhona lokhu esithi yisifinkisi. Kuxube umuntu lesilwane. Abanye kodwa bathi hatshi akusiso isilwane lesi, yinja.
Ha, inja ilenkulumo sibili. Kodwa kumaNdiya la ngabona umcephe wesigodo ubazwe wafana lofudu. Ukuze lokhu sikukhanyisele kudinga ukuthi sazi umbono walaba abantu mayelana lofudu.
