uMthunywa
Pathisa Nyathi
Zikhale zadela imbuzi zikhaliswa yikubulawa. Zifela iKhisimusi. Nanku phela lolo lusuku lapho abantu abazithokozisa khona bekhumbula usuku lokuzalwa kukaJesu. Amafekithali ayavalwa izisebenzi ziye ekhefini. Labo abalemali bayavakatshela izihlobo ezisemazweni akude. Abanye basuka emazweni lapho abasebenza khona afana leSouth Africa, iNgilandi iMelika iCanada lamanye amanengi abakithi asebaqonda khona besiyafuna imisebenzi.
Nxa isikhathi seKhisimusi sesisondele abazifuyileyo imbuzi bayazithengisa kulabo abaziletha emadolobheni okulabantu abazithengayo. Ziza ngezimota zizetshiywa ezindaweni ezahlukeneyo lapha koBulawayo. Ubunengi bazo zethulelwa emgwaqweni oqonda eKhami eduzane leWestern Commonage emapholiseni. Ezinye zethulelwa ngaphambidlana eduzane le-United Refineries okuphekwa khona isepa. Ezinye njalo ziseduzane leTshabalala kusiya ngeziphaleni.
Pho lonyaka iKhisimusi yakhona ibingathi iduma futhi ilumela ngoba izisebenzi zikaHulumende bezilokhu zingakaholi iholo lazo likaMpalakazi. Lalezo izisebenzi ebezithenjiswe ibhonasi kazisayinikezwanga.
Inengi emaphandleni lizadanela kuwo amacimbi ngoba kukhanya ekhona lonyaka. Ngeviki elidluleyo sike savakatshela enye ndawo emangweni weKezi lapho esihambe sibona amacimbi kodwa asesemancinyazana. Angithi nxa indlala ibhahile abantu basuke bawaqhulule esesemancinyane.
Laba abaphuma eSouth Africa labo bebebalutshwana ngoba iRandi lanyathela igazi lomkhoba latshelela.
Liyaphephuka nje kulezi insuku ngoba lingaselaso isisindo sezolo. Izivakatshi ezisuka kuleliya ilizwe ziza lamaqubaquba amaRandi kodwa afika kwelakitthi anciphe okudanisayo umuntu aphume lokuyimadlana nje. Kucina kungcono ukuthi umuntu angaze eza kuleli ezevakatsha kodwa athenge impahla khonale athumele ngabomalayitsha. Phela kibo kuyathengeka kulakuleli ilizwe. Injiva ezazishayina eminyakeni edluleyo sezizinhlanzi ezitshelwe ngamanzi. Impilo iyajikajika njengeviri lebhayisikili.
Sithi sisitsha phansi siphinde singene esihogweni saphezulu. Lapha sitsho ukukhwama komkhathi. Sebevuma abanengi ukuthi okunje akukaze kubonakale. Sebezebekhumbula umnyaka ka1992 lapho lakho okwakhwama kwadanisa. Isivuno kasizange sibekhona abantu basizwa yimphuphu eyathengwa elizweni leKenya. Yikho nje impuphu yakhona eyayilithanga yayibizwa ngokuthi yinkenya, loba isikundamoyo, umanqobinhliziyo ngoba kwakungadlelwa ubunandi kodwa ukusiza imiphefumulo. Abazalwa ngalowo umnyaka bethiwa amagama athi Ndlalambi. Basaphila lalamhlokhu oNdlalambi labo.
Ngiloba indaba le ngingoginqe shishi. Kutshisa vutha lanxa uphakati kwendlu. Lokukhangela phezulu sesadela ngoba sekusobala ukuthi izulu yisibhono sentwala, indlebe yensikizi. Kangikholwa ukuthi lalabo ababethe lizaphuza babekubona lokhu esesiphakathi kwakho. Utshani bezifuyo yebo singabuthenga buvelela ezindaweni ezithole izulu eliphose lanela. Izinyanga leziya esasizitshelile ingozi yalokho ezazikutsho sezaqunywa umlomo.
Umcimbi ezawenza eLuveve zagwaba ngawo waphelela emoyeni nanku phela izulu kalikabonakali. Sekusobala kubani lobani ukuthi lumnyaka ngomunye nje esingakaze siwubone ubunengi bethu selokhu sathwetshulwa yingwe. Kodwa insindabaphenduli ngamanzi. Kambe ukhona ongathenga athwale amanzi ezinkomo ezingamatshumi amahlanu?
Siyesaba sibili ukuthi kuvele kuzahamba njani ngonyaka ozayo. Kwezinye indawo inkomo zidla amahlamvu okokuthi kungasimahlamvu lawo ngabe imihlambi ilokhu icuba. Pho ababona ezomkhathi bathi inyanga le izaphela kungekho ububelo. Sesibeka ithemba lethu kuyo inyanga ezayo uZibandlela. Pho lebizo laleyo inyanga kaliseyikuhambelana lomumo okhona. Kuyakuthi ngalesi isikhathi utshani sebukhulile sebuziba izindlela. Kukhanya akunjalo lonyaka.
Esikwaziyo yikuthi umlimi akalahli ithemba. Ulisingatha ngaso sonke isikhathi. Kodwa akufanelanga ukuthi athembele kulo ithemba qha. Usafanele afeze amasu azasiza imiphefumulo yabantu kunye leyemihlambi kusukela enkukhwini kugoqela obabhemi, imbuzi, izimvu, ingulube kunye lezinkomo. Abantu bafanele bakhweze amasokisi babophe ziqine esiyakhona kukhanya kunzima kulukhuni futhi. Sisalindele ukuthi sibone lapho okuzawela khona induku loxakuxaku.
