uMthunywa
Pathisa Nyathi
SIHAMBILE sabona. Iviki edluleyo sayibopha imitshaqana amabombo sawabhekisa esigabeni seBeitbridge. Inhloso yethu bekuyikuyabona isimo semisebenzi yezamasiko lobuciko esiwuqhuba ezabelweni ezithi, Mangwe, Matobo, UMzingwane leBeitbridge. Kodwa uhambo engaluthandayo ngolokuya koMaramani.
Lindawo iyindawo eqakathekileyo ngoba eduzane nje imifula emikhulu iyahlangana. Sathi sisuka eBeitbridge sathi phaqa kwesenxele salandela umgwaqo olothuli. Sadlula eMakakabule okungummango olugwadule. Utshani kabubonwa ungabona amagundwane eqabujana.
Isimanga nje yikuthi imbuzi zakhona zinone ziyadabuka. Uyazibuza uswele ukuthi kanti zivele zidlani nanku phela ihlamvu lotshani ungezake ulibone, kusuka kubelula ukubona ilihlo lentwala. Sehla senyuka sibathathu emoteni iToyota. Sehla saze sayetheleka emfuleni omkhulu uMzingwane. Lapha usuyinkalakatha yomfula okhonywe yitshebetshebe. Ngakhumbula ukuthi lo umfula umncinyazana nxa uwuchapha usiya eFilabusi. Nxa usuwuchapha eWest Nicholson uyabe usumkhudlwana, ufuthelene ngemihlanga yokuphozisa abantwana.
Sihamba nje sisekele umfula uLimpopo, abawubiza uBembe kule indawo okukhulunywa khona isiVenda. Sathi sidlula kwenye indawo sathola imota imi kulabantu abalokhu bethalathalaza. Kwazikhanyela obala ukuthi laba balenhloso yokuchapha ngokungekho emthethweni. Amanzi ayemalutshwana emfuleni. Kanti siyasizwe kuthiwa umfula lo uyasinsitheka ngengwenya eziginya labo abazama ukuchapha ezindaweni ezingahlelwanga. Engxenye lonyaka yikuthi izulu lakhwayela yikho nje uLimpopo exega.
Sazibona izintaba ezilamatshe abomvu. Phela eduzane lenhlangano kaShashe laye uLimpopo ikhona intaba yodumo ethiwa yiMapungubwe. Uthi nxa usufikile eMaramani uyibone ikhanya ngaphetsheya kukaShashe esebanga ukuyahlangana loLimpopo. Uhle ubone nje ukuthi lapha kwakekwahlala abantu amatshe esancwebeka. Izihlahla ezandileyo lapha yizinga, ezifakaza amanxiwa.
Nxa betsho abasiki bebunda bathi lapha yikho okwaqala khona ukwakhiwa umuzi elemithangala. Kwathi inkosi yalabobantu yona lomdeni wayo yehla esiqongweni sentaba eliwatha phezulu kwathi abantukazana bona bakhela entabeni emfitshazanyana. Babefuyile abantu balo umango, izinkomo zidlana uboya ngoba utshani obulapho luhatshi oluthandwa zinkomo. Yanotha inkosi yacina ikhomba ngophakathi. Kanti abantu bakhona laba babesazi ukukhanda insimbi ukuze benze amakhuba, imikhonto, amasongo kunye lamahloka lezancele. Kodwa indawo le yabaluleka ikakhulu ngokuba lobudlelwano lama-Arabhu lamaPhuthukezi ayesogwini lwe-Indiya.
Abahwebi abamhlophe laba babedinga igolide elalilinengi kuzwekazi le-Afrika, ikakhulu emangweni weGwanda.
Abenza uphando ngale indawo bafumana igolide elinengi lapho okwakungcwatshwe khona amakhosi aleyondawo. Umfula uLimpopo yiwo owawulandelwa ngabahwebi baze bayeluwela ulwandle ukuze bayebula lalokho ababekuthola kuma-Arabhu lamaPhuthukezi:amalembu, ubuhlalu lamangqongqo.
