uMthunywa
Induku yami kayisagamuli
KHULU mina ngiqine saka kodwa kukhona okungidlayo. Induku yami kayisavuki ngendlela. Angithandabuzi ukuthi ngilohlupho ngoba kwezinye izikhathi nxa ngilowesintwana iyala ukuvuka. Kubangelwa yini lokhu Khulu? Nceda sengidubekile.
Impendulo
Uhlupho lwenduku lokulolwa kwazo lufuna amadokotela esibhedlela sibili. Kodwa kwesinye isikhathi nanzelela ukuba nxa usiyazingela kawulahlupho engqondweni njalo awukhathazekanga emoyeni ngoba lakho lokhu kulakho ukulalisa induku yakho. Njalo nanzelela ukuba othandana laye uyamthanda uqobo awubalisi kumbe awulansolo ngaye okungacina sekulahla imizwa yakho.
Kasenzeli lutho endlini
Ngingumama oleminyaka engu-29 yokuzalwa ngilomntwana oyedwa. Umkami yena ulabantwana ababili lomunye umama. Uhlupho lwami Khulu yikuthi ubaba lo kafuni ukwenza umlandu wakhe ngekhaya ngaphandle kokuthi abhadale irenti. Mina yimi engibhadalela umntwana i-school fees, ngithenge amagetsi kanye lokudla endlini. Umkami kafuni lokusithengela lempahla, uthi imali kayeneli ngoba siyakha ekhaya. Lokhu Khulu kakuqalisanga khathesi ngoba singakakhi wayehlala engolungisisa imota kodwa eyokuthenga ukudla engalayo. Ngicela ungeluleke ukuthi ngingenza njani ukuze ubaba asenzele konke okumele asenzele khona endlini.
Impendulo
Ngendlela obika ngayo udaba lolu lubonisa ukuba selixoxisane ngalo kakhulu lomkakho kodwa wala eyinsimbi. Kuyadingakala ukuba ukhangele isihlobo esiseduze njalo esilesifuba lixoxisane ngalokhu, njalo umfumbathise inkulumo ayise kumkakho baxoxisane kabanzi ngalokhu. Engabalakho ukucina encibilika laye enze njengamanye amadoda. Lawe nxa ukhuluma laye ngalokhu ungamkhahlamezi mbonise kuhle laye aze avuleke ingqondo abone ukuba akwenzayo kubi.
Umkami uyangitshaya
Ngithemba uqine saka Khulu. Sengilenyanga ezingu-18 ngendile njalo ngilomntwana. Umkami laye ulowakhe umntwana lomunye umama. Khulu ngiphila impilo ebuhlungu kakhulu angisazi ukuthi ngenzeni sengathi ngathathwa yinyamazana ngokwayo. Lokhu ngikubone sesihlala sonke. Umkami katshayi uyabulala ngiyake ngiqede amalanga amathathu kusiya kuviki ngivuvukile. Khulu ngingavele ngiphambanise ngibulawa kwezinye izikhathi lanxa ngingonanga lutho ngiyatshaywa. Yena kaphambanisi njalo kabongi ngingaze ngenze okuhle. Okunye okungizwisa ubuhlungu yikuthi kwesinye isikhathi ngithethiswa phambi komntanakhe sengize ngingasamthandi lomntwana lo. Lokuhlangana emacansini sihlangana kanye ngenyanga mhla efuna yena. Ngenzeni Khulu ngidabukile enhliziyweni.
Impendulo
Indaba oyikhulumayo iyangivavula amaphaphu ngicine sekungathi ngingumntwana wenyamazana abantu bengekho. Ububi bakhona abantu abanje kahle ngikuchazele kabanzi kumbe kabalanzalo uvele lo umntwana athi ngowakhe wamzalelwa. Yikho umfazi wakuqala wabalekela ukuthi uzabeletha abantwana bezixukwini ngenxa yendoda engazaliyo. Njalo isihluku samadoda anje yikuthi ayaphangisa ukubhadala amalobolo evala uhlupho lobunyumba bakhe. Yikho wena engikutshela khona. Ungaqali ukuzala usemzini wakhe. Uzakutshaya akubulale ehluleke ukuthi akutshele ukuthi umntwana lo umfebile ngoba yena engazali. Akungifanelanga ukukhuluma amazwi anje njalo akungilingananga kungathi ngithethisa umhlaba kanti ngikhulula wena emanyaleni omhlaba. Sigoqwa sisemanzi ntombazana. Ngakho ungatshoni uthonisa lumuntu ngoba ezakubulala. Bhala incwadi uthi kutshiywa kwakhiwe kodwa ekufeni akula sakhiwo. Ungibulalelani sala kuhle mina sengihambile kwabakwethu. Tshiya mama lingavele lilungise udaba lwenu lokwehlukana ungathandabuzi ukudinga umsebenzi. Ungazuza ofuna ukuphila lawe ungathandabuzi mzalele umntwana. Umkakho lo angakuzwa kuzammangalisa. Angakubophisa uthi wena inkomitsho ingagcwala iyachitheka. Sekwanele tshiya.
Kabamfuni umkhwenyana ongasonti lathi
Linjani Khulu?
Ngilejaha engithandana lalo kodwa uhlupho yikuthi abazali bami bathi kumele ngithathwe ngumuntu esisonta sonke. Mina ngileminyaka engu-25 njalo ngiyakholwa ukuthi sengimtholile usofa silahlane wami. Ngenzeni ukuthi abazali bami bamukele ijaha lami ngoba bathi ngingaqali ukuletha umuntu esingela kholo olufananayo. Nceda Khulu angifuni ukwehlukana lesithandwa sami.
Impendulo
Ngiyakhathazeka mzukulu nxa ngifunda amazwi owakhulumayo. Ukukhomba lokuthathana okwalezi izikhathi yilokhu, umuntu uthandana lomuntu osemhlabeni ahlala kuwo, ngakho into le kufanele ikukhathaze. Kuyinto enzima kakhulu ukuzibophela ejaheni elilokholo lwesonto lona lingelathando ngentombi elikhonza layo. Pho ngisapota wena, akulunganga ukuzibophela emuntwini ongelathando kuwe. Lokhu kucina amajaha lezintombi zesonto efanayo besehlukana ngoba behlanganiswe lukholo lwenkonzo kanti-ke abantu bahlanganiswa luthando lokuzwanana. Ngicela mzukulu wami, uyetshela umalumakho noma ubabamkhulu wakho loba ugogo nxa esaphila. Ubacele lababantu ukuthi ucela ukuthi bathwale udubo lwakho, ubatshele ukuthi amajaha esontweni yakini kalathando, akholwa ngoba efuna amantombazana. Kungani lona ibhiza lingeqela esibayeni samadonki kuzalwa imbongolo. Kulengcasiselo enkulumeni le eyokuthi imbongolo kutsho ukuthi ibhiza libambe indonki iganyavu. Pho umntwana ongaba laye lalumuntu ofunwa ngabazali bakho uzabizwa kuthiwe yini ngoba engazalwanga ngothando. Ngakho ungamekeli usofa silahlane wakho ngoba uthando yikufa silahlane hatshi ukufa silahlana. Ungamdanisi u-Prince wakho, futhi ubatshele ugogo lokhulu ukuthi ngicela indawo yokuzalela umntanami. Angifuni kubizwa ngamabizo amabi ngenxa yokuthi ngithandana lomkhethwa wami.
