uMthunywa
Siyahlangana njalo bafundi abahle kuzifundo zethu zokuhlomisana ngobuntu emphakathini. Kambe inhlonipho sisayibambile ekuphileni kwethu? Isasekhona inhlonipho ekuhambeni kwethu lapho sihlangana loZulu ezilindweni zamabhasi, ezitolo kumbe emibuthanweni yonke nje.
Kambe yikuphi esikunanzelelayo njengabafundi okoniwa ngabanye bethu ekuhambeni lekuhlanganyeleni loluntu ekuphileni? Ngiyazi singakubalisa kuze kutshone ilanga ngoba kunengi bakwethu.
Ake sithi jeqe inkulumo elandelayo.
“Ah jeki akuthi thezu mfo, awuboni itopi /ithayima lakho seliyinatshi esgidla.”
Le ngeyinye yenkulumo esiyizwa ngezindlebe simangale ukuba ulimi olunje lusiza ngani ekuphileni.
Omunye angazibuza imibuzo elandelayo.
Kambe umakhuluma lolulimi uzabalazo izingane ezizakhuluma ulimi oluqondileyo ekuphileni?
Ulimi olunje lulenhlonipho kumbe luyenyanyeka ebantwini bandla?
Kambe yona imihloliso umfundi okhuthalela ulimi olunje angayinqoba yini kungelabala eliqondileyo alikhulumayo?
Ngeqiniso isilaphalapha lesi asilunganga bantwabethu ngoba senza ulimi oluqondileyo okumele silumunye ebazalini lulahleke njengenhlanyelo ewele enkotheni engelakukhula ivuthwe idliwe.
Asizameni ukuletha inkulumo eyakhayo ekuphileni kwethu. Lisesilindweni samabhasi edolobheni.
Ibhasi isiphuzile ukufika. Abantu sebegcwele lapha, oluhlezi phansi seluze lwavala lamacimezo ngokukhathala. Abafundi bezikolo ezehlukeneyo sebemi amadlodlongwane kwazise bona abakhathali loba sekunjani.
Nampana osimbece losimbece baqhoba ithambo labo bodwa phakathi kwabanye kodwa okwabo kuyabonakala ukuba akusekodwa ngoba intombi ilokhu ithi lwazi, ibuye ikhophoze. Usimbece laye uselokhu eyixoxile indaba engelamkhawulo. Ngileqiniso abalapha abasabonakali. Asazi kumbe yikujwayelana kokufunda ndawonye kodwa umangoye uyasola. Imibuzo iyalandela.
Kambe laba ababili bangaletha mibuzo bani emphakathini ngokuziphatha kwabo njengentombi lejaha.
Lingabafundi bebanga linye, sikolo sinye, ungabaxwayisa uthini ngesenzo sabo lesi?
Ungumakhelwana wale intombi ungabalokumethemba lumntwana na?
Laba bobabili bangenza cebo bani lokuhlonipha umphakathi endabeni ezinje?
Likhotheme emkambo wezimpahla. Liphethe liyaphendla phendla. Nangu omunye ujaha laye ophendla izimpahla edinga ikawuso elentengo ephansi. Ngokuphendla nanku libamba kanye kanye ikawuso elohlonzi kanti njalo ibukeka inhle okwamagama. Kambe loludaba lungaphathwa njani?
Umathengisa nguye ongeza lesisombululo.
Omunye phakathi kwenu kufanele avume ukuyekela likawuso adinge eyinye elohlonzi. Ulakho ukuzuza enhle imihlolo okwedlula le.
Obambe icele elikhulu nguye okumele athathe lesisivunulo.
Kuhle ukwehla. Uzakhela ukuhlonipheka emphakathini kulokudala umsindo ngento encinyane.
Asihlanganeni kwelizayo bakwethu.
NguNkosikazi Sikhumbuzo Dabengwa.
