uMthunywa
YiNtatheli kaMthunywa
UKWEHLULEKA kwabagijimela isizwe kumncintiswano yamaOlympics sekuveze ukuthi abaqeqetshi bakuleli kanye labo abadlali kumele banikezwe imfundiso enganceda ukuthi kube lempumela engcono.
Ngenxa yalokhu, kulengcitshi yezokuqeqetshwa komdlalo wokugijima uDarryl Anderson okubikwa uzakwethekelela idolobho lakoBulawayo ngenhloso yokuzophawula ulwazi ngalumdlalo, kutsho inhlanganiso yePayne Global Sports International.
Kumbiko othunyelwe iphephandaba likazulu ngoLwesithathu, isikhulumi sePayne Global Sports International sibike ukuba uAnderson uzafika kontuthu ngeSonto.
IPayne Global Sports International ikhokhelwa nguArnold Payne, laye oyaziwa ngesiqubu sokugijima kuleli. UPayne wake wabayintshantshu yezokugijima umjaho we-400m lapho abamba khona irekhodi lemzuzu-45, 2 seconds.
“Inhlanganiso yePayne Global Sports International ithanda ukwazisa ukuthi inxuse uDarryl Anders ingcwethi yomdlalo wokugijima umhlaba wonke njalo ongumqeqetshi oselolonge abagijimi asebephumelele.
“Umqeqetshi lo kukhangelelwe ukuthi afikele enkundleni yendizamtshina eyeJoshua Mqabuko Nkomo ngeSonto.
Ngeviki elandelayo uzaxoxisana lezikhwicamfundo labafundi esikolo seSchool of Hospitality kanye lokuvakatshela inkundla yeWhite City,” kuchaza isikhulumi sePayne Global Sports International uLovemore Dube.
Enkundleni yeWhite City kuzwakale ukuthi uAnderson uzangenisa ekilasini abaqeqetshi bomdlalo wokugijima.
“UAnderson ngumqeqetshji olembali ehlonitshwayo kumdlalo wokugijima.
“Ukuza kukaAnderson ngokwakuqala kumbali yokugijima kuleli. Le ngeminye imizamo yokuthi abagijimayo bazibonakalise, balolongwe ukuze bayencintisa emazweni, kutsho uDube.
UDube uthe iPayne Global Sports International inxusa bonke abazazi belethalenta lokugijima ukuthi bazothapha ulwazi oluzabanceda nxa sebencintisa.
“Sithi akubuye wonke umuntu ozaziyo ukuthi ulethalenta kulumdlalo. Amaqembu wonke alolonga umdlalo lo asetsheliwe ukuthi uAnderson uyeza.
“Kuziqinti ezesiduzane lakoBulawayo, sikhuthaza njalo ukuthi kube lemizamo yokuthi abaqeqetshi, ababalisi lenkokheli zize ngobunengi bazo zizo thola ulwazi lwamahala oluvela kuAnderson.”
UDube wengeze wathi: “Lokhu ngokwakuqala eZimbabwe. Sifuna ukuthi silolonge abantu abazathola imendulo zegolide kumincintiswano yokugijima elandelayo ngomnyaka ka2018 lango2020.
UAnderson useqeqetshe emakolitshini lasemanyuvesi amanengi ezweni leMelika. Nguye umqeqetshi owalolonga uLewis Banda, umgijimi wakuleli osehlala eMelika.
“Ngokunjalo, loPayne uzakhangelisisa abantwana abalethalenta kuleli ukuze bathole ithuba lokuyafunda emakolitshini eMelika, lapho abazaphakamisa umdlalo wabo wokugijima,” nguDube lo.
