uMthunywa
YiNtatheli kaMthunywa
IBULAWAYO Athletics Board (Bab) isinxuse ingcitshi kwezokuqeqetshwa komdlalo wokugijima imango emfitshane uMugometsi Ketuimile waseBotswana ukuze ayengezelele ulwazi kubaqeqetshi bakuleli .
Umqeqetshi uza koBulawayo ngesikhathi idolobho lizaqhuba umncintiswano ozadibanisa intshantshu zeziqubu ezivela kuzo zonke izabelo zelizwe. Ngokubika kweBab, izifundo zomdlalo wokugijima lezi zizaqhutshwa esikolo seNorthlea kusukela ngoLwesine kusiyafika ngoMgqibelo.
Umgcinisihlalo weBab uManuel Mpofu uthe ingcitshi enxusiweyo le izathi iqeda kufundisa iyebona ithalenta kumncintiswano wemango emide ezagijinyelwa eHillside.
“Silokuthaba ukwazisa abathandi bomdlalo wokugijima ukuba sinxuse umqeqetshi wodumo ovela eBotswana uMugometsi Ketuimile ozafundisa ngokuthile mayelana lomdlalo wokugijima.
“Sicela njalo abathandi bezemidlalo koNtuthu ukuthi baze ngobunengi babo kumncintiswano walonyaka owemijaho yemango emide ozabe useHillside kulimpelaviki,” kutsho uMpofu.
Idolobho lakoBulawayo lemukela abagijimi abavela kuzo zonke izabelo kulumkhosi lapho okuzaphuma iqembu lalabo abazamela isizwe kumincitiswano yokugijima yamazwe.
UMpofu uthumele umbiko ukuba iBulawayo Athletics Board isilungiselele yaphelela ukwamukela izethekeli.
“Lonyaka amaqembu agijimela izabelo zelizwe adibana lapha koBulawayo enkundleni yeHillside Dams ngempelaviki.
“Kulumncintiswano kuzagijinywa imango emide kuphela kudingwa intshantshu zeziqubu. Ngemva kokuthola intshantshu lezo, kuzakhethwa iqembu elizamela isizwe,” kutsho uMpofu.
UMpofu uthe iqembu lakoBulawayo likhangelele ukwenza kahle kulumnyaka.
“Ithimu yethu koBulawayo iqedile ukulolonga ngakho sihlose ukuthi sigijime okungcono kulalokhu esakwenza ngomnyaka ophelileyo. Abaqeqetshi bethu bobathathu uThulisile Dube, Sicino Mpofu loMusawenkosi Thabane bayasuthiseka ngomsebenzi owenziweyo. Bobathathu laba balolwazi lamaqhinga okulungiselela iqembu ukuze liyenqoba.”
Isabelo esilakho ukuhlupha ngethalenta kulumncintiswano ngeseMasvingo, esesidume ngokuhluthuna imendulo ezinengi kumango emide.
Phakathi kwaleliqembu kugcwele ithalenta labantwana abasakhulayo besikolo seMpopoma High ababalisa uBuhle Nyoni, uTalent Sibindi loTatenda Ndlovu. Amathemba esabelo sakoBulawayo akhona njalo kwasebekhulile ababalisa uAnne Chirisa ogijimela iFairbridge, uBrenda Banda wasesikolo seNorthlea High loDenford Mlilo weSparrows.
“Sikhethe iqembu labagijimela isabelo sakoBulawayo ngeviki edluleyo. Iqembu leli lilabantu abangamatshumi amathathu lasithupha. Ngiyakholwa ukuthi iqembu leli lizaphumelela ngoba sikhethe ithalenta lodwa.”
Iqembu ngokugcweleyo:
Omama: Anne Chirisa (Fairbridge), Faith Sikhosana (School of Mines), Linet Tom (ZRP), Sandra Taderera (Sparrows), Brenda Banda (Northlea high).
Obaba: Dumo Mkhwananzi (Sparrows), Witness Mangwiro (Sparrows), Nigel Ncube (Northlea high), Freedom Banda (Sparrows), Tafadzwa Zhou (Northlea High), Mhlengi Ncube (Luveve High),Trust Chidomaya Fairbridge), Baberton Mhlanga (Fairbridge), Willard Mutasa (Jumbos Athletics club), Ubert Dube (Fairbridge), Denford Mlilo (Sparrows), Philemon Mudzinganyama (Jumbos).
Amankazana: Buhle Nyoni (Mpopoma High School), Lucy Fuyana (Ingubo Primary), Ratidzo Nyathi (Ingubo Primary), Talent Sibindi (Mpopoma High), Samantha Ndlovu (Mpopoma High), Mercy Fuyana (Ingubo Primary), Tatenda Ndlovu (Mpopoma High), Londis Ncube (Northlea High), Patience Gurure (Sparrows), Yvonne Mutare (Ihlosi athletics club), Yvonne Mpofu (Northlea High), Christabel Nyathi (Luveve High).
Abafana: Gamuchirayi Mutimusakwa (Mpopoma High), Luckmore Mpofu (Malindela Primary), Hillary Sibanda (Ingubo Primary), Quinton Chivimbiso (Ingubo Primary), Sibusiso Moyo (Ingubo primary), Makabongwe Sibanda (Inkanyezi Primary).
Abaqeqetshi: Thulisile Dube,Sicino Mpofu, Musawenkosi Thabane.
