uMthunywa
Siphathokuhle Ngulube
Salibonani bafundi. Ngithemba lenza kahle ezifundweni zenu. Kuleli iviki sizakhangela ingcazelo enhle lembi yohleko. Ukuhleka kuyinto enhle kakhulu njalo kuqakathekile emzimbeni womuntu. Phela ukuhleka kutshengisa ukuthi umuntu ukhululekile njalo yonke into ihamba kuhle kuye. Lanxa kunjalo kukhona ukuhleka okungamukelekiyo esintwini.
Abanye benu basuka bahleke lezinto ezingahlekisiyo njalo ukuhleka kwabo kusuke kucunule kakhulukazi. Kukhona ukuhleka okuveza ukweyisa. Abanye abantu bayahleka omunye umuntu usulu kukhombe nje ukuthi umuntu lo weyisiwe ngendlela abayabe behleke ngayo.
Lokhu ukuhleka akwamukelekanga esintwini. Kulihlazo elikhulu. Lukhona njalo uhleko oluveza ukudelela. Abantwana bakulezi insuku bayadelela kakhulukazi okokuthi ungazonda ubatshaye uphose ubabulale. Lokhu phela bakuveza ngokuhleka abantu abadala nxa bebakhuza. Lokhu kukhomba ubuqholo kanye lokuswela ubuntu okumangalisayo.
Okunye njalo ukuhleka kukhomba ubuqholo lenkani. Omunye umuntu uyathi ekhuzwa kumbe etshelwa ukuthi enze ulutho oluthile amane ame nje anganyikinyeki kodwa ephethe ehleka. Lokhu kuhle kuveze sobala ukuthi ngumuntu olenkani, uhleko lwakhe luyabe luveza lokho. Ake sikhangele izehlakalo ezilandelayo:
(1) UThemba ungena endlini yokufundela egqoke isicathulo esitsha. UNjabulo labangane bakhe bayambona ukuthi ugqoke isicathulo abangasaziyo. UNjabulo uhle alale ngokuhleka ekhangele ezinyaweni zikaThemba. Abangane bakhe bathi bembona uNjabulo labo bathi vuthu baqonde emnyango labo bakhangele izicathulo zikaThemba balale ngokuhleka baze bakhale izinyembezi. Lokhu kusuka kwenze uThemba abelesithuli ame nje aswele lokuthi enzeni.
(a) Kuqondile yini lokhu okwenziwa ngoNjabulo?
(b) Ubona angathi uhleko lwabo lolu lungabe lusitshoni ngesicathulo sikaNjabulo? Basibona sinjani?
(c) Lolu uhleko luvezani? Ukweyisa kumbe ukuvuka? Utsho ngani?
(2) Unina kaMethembe ufica uMethembe labangane bakhe behlezi ebholohweni. Ufika atshinge kakhulukazi atsho ukuthi kungani behlezi ebholokweni. Utshinga kangaka unina kaMethembe, oMethembe bamile abanyikinyeki bayahleka nje. Omunye wabo uzwakala ehleka ethi, “Aaah umasande lo unjani?” Nxa etsho njalo bonke baya lala ngohleko.
(a) Ukuhleka lokhu kuveza similo bani sabafana laba.?
(b) Ukuhleka kwabafana laba bemile benganyikinyeki kuvezani?
(c) Kuqondile yini ukuhleka nxa ukhuzwa ngumuntu omdala?
(3) Umbalisi wenombolo uthi engena endlini yokufundela akhubeke aphose awe okumangalisayo. Kusenzeka lokhu abafundi beviyo lonke baya lala ngokuhleka umbalisi abe lolaka athathe uswazi angenele wonke umfundi kodwa abanye bajinge behleka kunjalo.
(a) Umbalisi ubengawa alimale kodwa abafundi bayahleka. Kuveza similo bani ukuhleka kwabafundi laba?
(b) Kuqondile yini ukuthi uhleke umuntu omdala njalo lokuhleka umuntu ombonayo ukuthi usengozini?
(c) Luhleko oluqondileyo yini lolu?
Siyakunanzelela yini bafundi ukuthi kukhona ukuhleka okungamukelekiyo emphakathini? Zikhona izinto ezingahlekisiyo ezithi nxa ungabonakala uzihleka abaseduze lawe basuke bamangale ukuthi ungumuntu onjani.
Asinanzeleleni ukuthi asimane sihleke nje izinto okungafanelanga sizihleke ngoba kusuka kuveze izimilo ezingazinhle. Kuqakathekile ukuba sizihlole empilweni. Asihlanganeni ngeviki ezayo.
