uMthunywa
IQEMBU elikhokhelayo kuligi yeAbsa, eleKaizer Chiefs selehlukane lomdlali walo wemuva uLorenzo Gordihno okubikwa usezayibamba kuBidvest Wits.
Umdlali lo usuke engasajabuli nanko uchithe isikhathi esinengi esebhentshini kulisizini.
IChiefs imemezele isivumelwano sayo leWits ngalumdlali ngoLwesibili emini. UGordinho, oleminyaka yokuzalwa engamatshumi amabili lanhlanu (25) usayine ikhontileka yeminyaka emibili lezinyanga eziyisithupha kuWits, ebanga isicoco seligi leChiefs.
Umdlali lo bebengamniki ithuba lokudlala o-Eric Mathoho, loDaniel Cardoso, izikhala zabo ezivame ukuvalwa nguSiyabonga Ngezana kumbe nguYagan Sassman nxa oyedwa wabo engekho. UGordinho ubuyele kuChiefs ngemva kokudlala kuhle ekuBloemfentein Celtic ngesizini edluleyo, iqembu ayebolekiswe kulo.
Ujoyine leliqembu laseSoweto eleminyaka engu-15, wadlala umdlalo wakhe wokuqala bedibene leMaritzburg United ngoNhlolanja, mhlaka 11 ngo-2014.
Evalelisa uGordinho uthe: “Ngiyabonga kuye wonke umuntu kuKaizer Cheifs . . . usihlalo, umdeni wakwaMotaung, bonke abaqeqetshi, lezisebenzi. Wonke umuntu udlale indima ekukhuleni kwami njengomdlali lasempilweni kuleliqembu. Angisoze ngakhohlwa abangane engikhule labo. Ngizathatha konke engikufunde kuChiefs ngihambe lakho esigabeni sami esilandelayo ebholeni.”
Ekhuluma ngokuhamba kukaGordinho uBobby Motaung ogumaneja weChiefs uthe bekunzima ukutshiyana lomdlali lo.
“Belunzima udaba lukaGordinho ngoba usehlale lathi iminyaka elitshumi kusukela esadlala kumaqembu aphansi. Inkinga yakhe kodwa yikuthi ubefuna ukudlala. Lathi besingafuni ukuvimba ikusasa lakhe ebholeni ngoba ubesethole ithuba lokuba yingxenye yelinye iqembu elikhulu. Siyabonga kuLorenzo ngakwenzele iKaizer Chiefs kuyo yonke iminyaka le,” kutsho uMotaung.
IChiefs iphinde yamemezela ukuthi isiqamule ikhontilela lomdlali waseGhana ofike ethwelwe ngeqoma, uJames Kotei. UKotei uqamule ikhontileka yakhe leChiefs engadlalanga lowodwa umdlalo weligi. Ubonge uthando aluthole eqenjini.
“Loba ngingaphumelelanga kuChiefs, uthando kuleliqembu ngilalo. Ngiyayithanda indlela abaphatha ngayo iqembu. Ngiyathemba iChiefs izakuba yintshantshu kulisizini,” kutsho lumdlali.
Ukutshiya kukaKotei kuqinisa izinkomba zokuthi iChiefs isisondele esivumelwaneni lomdlali waseKenya u-Anthony Akumu (27) osekulamaviki kukhulunywa ngaye.
Umdlali lo wabonakala ebuka umdlalo waMakhosi eFNB Stadium ngesikhathi eguqisa iHighlands Park nge 3-0. U-Akumu ungumdlali wasesiswini osedlalele iqembu lesizwe imidlalo engu-38. — Ubulembu.
