uMthunywa
YiNtatheli kaMthunywa
SEKUNGATHI kungene idimoni ngokutshintshwa kwebizo lenhlanganiso ephethe umdlalo wenguqu kuleli.
UPhilip Chiyangwa uphume kumaphephandaba ngeSonto ebika ngeliphezulu ukuthi imuli yenguqu ayikhohlwe ngebizo elithi Zifa ngoba seladuma laphela kodwa abemukele inhlanganiso entsha ebizwa ngokuthi yiNational Football Association of Zimbabwe (NFAZ).
Ngokutsho kukaChiyangwa, konke okweZifa sekwaphela. Lokho kubikwa kutsho ukuthi izikwelede zalinhlanganiso ezibiza imali efika i$6miliyoni zizesulwa.
Umbiko kaChiyangwa lo usutshiye ingatsha zenguqu ezinengi zimangele ngoba kwenzakale kungela obecabangela.
UChiyangwa ugcizelele ukuthi ibizo elithi NFAZ leli selikhona ngempela njalo akulamuntu olomlandu wokuphikisana lokwenzakeleyo.
Ekhuluma loMthunywa kuliviki osaphethe isikhundla sikamaqhuzu wenhlanganiso yeNFAZ uJoseph Mamutse ubike ukuthi okwenzakalayo kwakusemthethweni.
“Njengokutsho kwethu, amalunga enhlanganiso ahlangana ngoMgqibelo abopha iqhinga lokuthi kutshiyanwe lebizo elithi Zifa kuthathwe lelo elithi National Football Association of Zimbabwe.”
Ngokuzwa kwephephandaba likazulu amakhansila angamatshumi amahlanu lane avumelana ukuthi kube lebizo elitsha.
Kodwa loba kunje, inyathelo likaChiyangwa labanye bakhe alamukelwanga kuhle.
Inhlanganiso yeSports and Recreation Commission iphume kumaphephandaba izolo ibika ukuthi isithole umbiko wokutshintsha kwenhlanganiso yenguqu.
“Sesitholile incwadi ebika ngokusungulwa kwenhlanganiso yeNational Football Association of Zimbabwe,” kutsho uJoseph Muchechetere osabambe isihlalo sikamqondisi omkhulu.
ILifelong Footballers Trust, okuyinhlanganiso yabadlali abadla ubhedu iyala ukutshintshwa kwebizo lokhu ngoba sekuzesula imbali yenguqu.
Ilunga elikhulu lenhlanganiso le uFrancis Zimunya uthe kungangcono kube lokhetho olutsha ngoba okwenzakeleyo kufana lokuqila imuli yenguqu.
Akhona amagqwetha labaqeqetshi abangaphansi kweZimbabwe Coaches Association kanye labadlali abangaphansi kweFootball Union of Zimbabwe ababike ukuthi ngeke bevumelane lenyathelo leli.
