uMthunywa
Innocent Kurira
UMDLALI weHighlanders, uDevine Mhindirira, usephendukile eqenjini nanko uselolonga labanye abadlali loba nje kwakuke kwavela imbiko yokuba iqembu belicabange ukumkhafula kulisizini.
UMhindirira engachazwa njenge “ndodana yolahleko” ngoba uphenduke eqenjini ngesikhathi ezinye iziphathamandla zikubeke emphakathini ukuthi umdlali lo “ulihlongandlebe” njalo kungenzeka alinge abanye ukuthi baphambuke endleleni. Umbono lo wavezwa emhlanganweni we-Annual General Meeting (AGM) wamalunga eHighlanders ngoZibandlela nguJohnfat Sibanda owayengumgcinisihlalo weqembu.
USibanda wakutsho lokhu kwavela ukuthi kabafuni lakumbona lumdlali ngoba bekholwa ukuthi engakhuthaza abanye abadlali ukuthi bahlamuke.
UMhindirira akuthandabuzwa ukuthi ngomunye wabadlali abalesiphiwo kumdlalo wenguqu kodwa ukwaliwa lokugconwa kwakhe yiHighlanders kwamtshiya esemahlangeni, engasazi ukuthi uzawela kuliphi iqembu.
Iphephandaba likazulu lidobhe udletshana lokuthi inkokheli labaqeqetshi beHighlanders bakhethe ukuthi baxole kukho konke okwenziwa ngulumdlali, okuyikhona okwenze wabonakala etshibilika laye kumahlandla okulolonga kumalanga ambalwa adluleyo.
UMhindirira kazange abonakale elolonga leqembu ekuqaleni komnyaka, okulinyathelo okwacatshangelwa ukuthi wayehlose ukutshengisela ukuthi iHighlanders kayimbhadalanga imfanelo zakhe ngokugcweleyo.
Ubelinde ukuthi abizwe futhi kumbe akhitshwe eqenjini.
Umdlali kaqalisi ukwenza lokhu njalo useke wahlaliswa phansi elaywa ngabadala.
Iphephandaba likazulu likubika ngokugcweleyo ukuthi uMhindirira uselolonga leHighlanders. Umbuzo okhona yikuthi iBosso izamnikeza elinye ithuba ngokugcweleyo na?
Imzamo yokuthola umbono weHighlanders ngomdlali lo yehlule. Umaqhuzu weqembu uRonald Moyo lesikhulumi seqembu kabazange baphendule imibuzo yephephandaba likazulu ngoLwesithathu.
Isivumelwano sokudlalela iHighlanders kubikwa siphela ngoNhlangula. Umdlali lo ubengabambeki ecingweni kodwa ukulolonga kwakhe leHighlanders kuyaziwa.
Ukuphenduka kwakhe eqenjini kuzathabisa labaqeqetshi abatsha uKelvin Kaindu labasekeli bakhe uTry Ncube loAgent Sawu ngoba bayazi ukuthi uyinsika yokuqhuba ibhola esiswini senkundla.
