INaaz ilungiselela umjaho enkabazwe

07 Feb, 2019 - 00:02 0 Views
INaaz ilungiselela umjaho enkabazwe National Athletics Association of Zimbabwe

uMthunywa

Nkosilathi Sibanda
INTSHANTSHU zokugijima imango emide kuleli ziyadibana okwakuqala edolobheni leKwekwe kumjaho oqoqwe yinhlanganiso yeNational Athletics Association of Zimbabwe ngempelaviki.

Abagijimi abedlula inkulungwane bazatheleka eNkabazwe ngoMgqibelo lapho okuzadingwa khona labo abazamela isizwe kumncintiswano yamazwe ezaqhutshwa kunyanga ezilandelayo.

Kulumncintiswano isabelo sakoBulawayo sisaphethe imendulo yegolide ngemva kokuba yintshantshu ngomnyaka odluleyo.

Umncintiswano lo uvula ikhalenda yenhlanganiso yeNational Athletics Association of Zimbabwe (Naaz) ebike ukuba kulumnyaka izasebenzela ukuthi ibumbe iqembu lesizwe elizakuyancintisa phetsheya liphenduke lemendulo.

Iqula labagijimi bakoBulawayo likhokhelwa nguTrust Chidomaya.

UChidomaya owaziwa ngokuba lesiqubu egijimela iqula leZRP uzasekelwa nguUntibile Maphosa oweSuper Stars Athletics Club.

Inhlanganiso yeBulawayo Athletics Board ibikele uMthunywa ngoLwesithathu kuliviki ukuba sebeqoqe iqembu abalethemba lokuthi lizaphendukisa imendulo yegolide koNtuthu.

Kubikwa sekukhethwe abagijima imango emide ababalisa uFaith Nyathi (City Meats), Yvonne Mutare (Ihlosi Athletics Club), Michael Chimhuka (ZRP), Freedom Banda (Sparrows), Disciple Ncube (Ihlosi Athletics Club), Chidomaya (ZRP), Ngonidzashe Ncube (ZRP), Danford Mlilo, Dumo Mkhwananzi, Thando Maphosa (Sparrows) loXolani Ncube ogijima ezimele yedwa.

Labo abazaqeda begijime ngesikhathi esifaneleyo kubikwa bazakhethwa ukuba yingxenye yethimu yeZimbabwe ezancintisa kuWorld Cross Country Championships ngoMbimbitho eDenmark.

Umongameli wenhlanganiso yeNaaz uTendai Tagara uthe labo abazakhethwa bazaphinde bagijimele isizwe kumjaho weAfrican Junior Championships oqhutshwa kusukela mhlaka 16 kusiya ku20 Mabasa eCote d’Ivoire.

“Umncintiswano esiwukhangelele kakhulu ngomkhulu owe-International Athletics Association Federation (IAAF) ukuze ilizwe lithole inhlonipho kulumdlalo, anduba silungiselele imidlalo yama-Olympics,” nguTagara lo ekhuluma lephephandaba likazulu.

Esethula uhlelo lokulungiselela umncintiswano wangempelaviki, umgcinisihlalo weBulawayo Athletics Board uManuel Mpofu uthe akulanto engabaphazamisa.

“Njengesabelo sakoBulawayo, intshantshu zalumncintiswano, silungiselele saphelela. Umjaho lo ozabe useKwekwe uzasitshengisa ukuba siqine okunganani lokuthi abagijimi bethu bazimisele na ukuyaphambili.”

Share This:

Sponsored Links