uMthunywa
Nkosilathi Sibanda
INTSHANTSHU zokugijima imango emide kuleli ziyadibana okwakuqala koBulawayo kumjaho oqoqwe yinhlanganiso yeNational Athletics Association of Zimbabwe (Naaz) ngempelaviki.
Abagijimi abedlula ikhulu bazatheleka eHillside Dams ngoMgqibelo lapho okuzadingwa khona labo abazamela isizwe kumincintiswano yamazwe ezaqhutshwa kunyanga ezilandelayo.
Umncintiswano lo uvula ikhalenda yenhlanganiso yeNaaz ebike ukuba kulumnyaka izasebenzela ukuthi ibumbe iqembu elizakuyancintisa liphenduke lemendulo.
Esethula uhlelo lomncintiswano wangempelaviki, uManuel Mpofu onguMgcinisihlalo weBulawayo Athletics Board, uthe kuzagijinywa imango ye-2,5km, 8km, le10km.
“Lonyaka umncintiswano weNaaz Championships owemango emide useHillside Dams koBulawayo. Njengenhlanganiso ephethe ezokugijima kulelidolobho, kungumthwalo wethu ukuba sibone ukuthi konke kuzaqhutshwa kuhle. Kuzagijima abasakhulayo abazagijima i2,5km. Kuzakuba lama-relay azancintisela i-8km. Kumango ofanayo kuzagijima elinye ihlandla labasakhulayo. Umango omude owe-10km uzancintiswa yilabo asebekhulile.
Ukuphatheka emncintiswaneni yimahala kulabo abangaphansi kwezabelo. Abagijima bengaphandle kwezabelo bazabhadaliswa i-$3 abadala, kuthi abantwana bazangena nge-$2. Amaqembu agijima i-relay abhadala i$4 kuphela. Lo ngumncintiswano womuntu wonke ngakho izakhamizi zakoBulawayo ziyacelwa ukuthi ziphatheke zibuye ngobunengi bazo,” kutsho uMpofu.
Kumijaho enje, kwandise ukuthi kunqobe abagijimi abaziwayo ngesiqubu semango emide ababalisi uNkosiyazi Sibanda, uMilton Matende uRutendo Nyahora ogijima eseSouth Africa loConstance Chidziva.
Abanye ababili abakhangelelwe ukuthi bahluphe ngesiqubu nguTatenda Shumba loTinashe Muyanga abaseMelika, okubikwa sebetshaye intambo ngezikhathi ezibavumela ukuthi babeyingxenye yeqembu lesizwe.
Ngaphandle kwalumncintiswano, iNaaz izaphinda iqoqe eminye ngenyanga kaNkwenkwezi incedisana lezinye nhlanganiso lamankampani. Kumijaho le kulowe-ZITF Coca-Cola Four-Minute Mile lowe-Old Mutual Nkulumane Marathon.
Uluhlu lwemincintiswano olukhitshwe yiNaaz luveza ukuthi kuzagijinywa umnyaka uze uyephela.
