uMthunywa
IZWE lase-Egypt lizosingatha imidlalo ye-African Cup of Nations ezoqala mhlaka 15 ngoNhlangula kusiya ku-13 Ntulikazi. Lezi zindaba zimenyezelwe umongameli weConfederation of African Football (Caf) u-Ahmba Ahmad ngoLwesibili eDakar, eSenegal.
Izikhulu zeCaf zikhethe i-Egypt kule-South Africa layo ebikhangelele ukuthi izaphiwa lelithuba. Ukuncitshwa kwayo lelithuba kudanise inhlanganiso yeSouth Africa Football Association (iSafa) ekubone sengathi bayikhiphe ukudla emlonyeni.
Imidlalo yenkezo yeAfcon kwakumele idlalelwe kwele-Cameroon, kodwa kwehlule ukuthi ihlele imidlalo le.
Umongameli u-Ahmed uthe: “Ngifisa ukuwabonga amazwe la womabili, ancedisane leCaf ngesikhathi sibona ukuthi umsebenzi wokusingatha i-Afcon eCameroon ubungakaqali,” kutsho u-Ahmad.
Isikhulu seCaf lesi sazise intatheli ukuthi i-Egypt ithole amavoti angu-16 kukhomithi ebivota, iSouth Africa Afrika yathola elilodwa zwi.
Lesi simemezelo senziwe phambili kokuba iCaf ithe yenze umcimbi wemiklomelo yabadlali eDakar ngoLwesibili ntambama.
Kuzobe kungokwesihlanu i-Egypt isingethe i-Afcon njengoba yenza okufanayo ngo-1959, 1974, 1986 lango-2006.
ISAFA ifake isicelo sokuphatha imidlalo le. Kubikwa abalandeli abanengi eAfrica bebefisa ukuthi imidlalo le yenziwe kwele-South Africa.
Kulandela ukuncitshwa kweMzansi lokhu, inhlanganiso yeCaf yenze umcimbi wokubonga abadlali abenze kahle lapho uMohamed Salah wase-Egypt odlalela iLiverpool othole isicoco esiphezulu.
Umdlali lo usephiwa lumvuzo okwesibili iminyaka ilandelana njalo unqobe omunye wakhe kuLiverpool uSadio Mane lo Pierre-Emerick Aubameyang owe-Arsenal.
Amavoti la enziwe ngabaqeqetshi labaqondisi benguqu abaphuma kumazwe angamatshumi amahlanu lasithupha angaphansi kwenhlanganiso yeCaf.
